Macarıstanda fəaliyyət göstərən Macar-Turan Vəqfinin illik toplantısı keçirilib.
Ednews xəbər verir ki, bu ilki toplantının əsas və ana mövzusu Azərbaycanın Qarabağ məsələsi olub. Azərbaycanın Qarabağın işğalından bu günə qədər vətən torpaqlarından vazkeçmədiyi, beynəlxalq camiədə, Avropa Birliyi, media, qeyri-hökumət təşkilatları da bu sahədə gecə-gündüz çalışdıqları vurğulanıb. Eyni zamanda Azərbaycanın 44 günlük Qarabağ müharibəsində torpaqlarını azad etməyi də toplatında qeyd edilib. Görüşdə Qarabağın azad edilməsi alqışlarla qarşılanıb.
Toplantıda Macar-Turan Vəqfi sədri Andras Biro Zsolt, Macarıstan parlamentinin vitse-spikeri, bu Qurultayın əsas hamiçisi kimi tanınan Sandor Lezak, Bugac bələdiyyə sədri Szabo Laszlo, Vəqfin nümayəndələri və media təmsilçiləri iştirak edib.
Toplantıda “Atəşkəs” filmi nümayiş edilib. “Atəşkəs” sənədli filmi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı, Macar Turan Fondu və Beynəlxalq Avrasiya Mətbuat Fondu tərəfindən birgə istehsal olunub.
Filmin nümayişindən əvvəl Xocalı soyqırımının qurbanları və Qarabağ müharibəsində şəhid olan vətəndaşlarımızın xatirəsi bir dəqiqəlik sükutla yad edilib.
Filmdə Ermənistanın Azərbaycana qarşı təcavüzü, Qarabağ münaqişəsinin yaranma tarixi, o cümlədən Azərbaycanın Cənubi Qafqazın lider dövləti kimi tarixi-mədəni irsi, ənənələri öz əksini tapıb. Azərbaycanın tarixən üzləşdiyi ədalətsizliklər, Qarabağ müharibəsinin acı nəticələri, Xocalı faciəsi filmin əsas qayəsini təşkil edir. Ekran əsərində macar, alman, fransız, amerikalı ekspertlərin münaqişənin həlli ilə bağlı fikirləri, münaqişə qurbanlarının, şahidlərin ifadələri yer alıb. Qarabağ həqiqətlərindən bəhs edən filmdə Azərbaycanın müasir tarixinə dair faktlar, eləcə də torpaqlarımızın işğalı nəticəsində doğma yurdlarından köçkün düşmüş insanların acı həyatı öz əksini tapıb.
Filmin əsas məqsədi erməni qəsbkarlarının azərbaycanlılara qarşı törətdiyi amansız cinayətlərin Macarıstanın timsalında bütün Avropa ölkələrinə düzgün formada çatdırılması, Azərbaycanın bu məsələdə haqlı mövqeyinin dünya ölkələrində təbliğidir. “Atəşkəs” sənədli film Türkiyədə ən nüfuzlu mükafata da layiq görülüb.
Mərhum millət vəkili Qənirə Paşayevin Macar-Turan Vəqfi ilə fəaliyyətlərindən söhbət açılıb. Qənirə xanım rəhmətlə yad edilib.
Bundan başqa qarşılıqlı əməkdaşlıq, həyata keçirilməsi nəzərdə tutulan yeni ortaq layihələr, ortaq tariximizin və mədəniyyətimizin öyrənilməsi, gənc nəsillərə çatdırılması, Azərbaycan həqiqətlərinin Macarıstan ictimaiyyətinin diqqətinə çatdırılması, Macarıstan mədəniyyətinin Azərbaycanda daha geniş tanıdılması ilə bağlı fikir mübadiləsi aparılıb.
Qeyd edək ki, Macar Turan Vəqfi Macarıstanda faəliyyət göstərən nüfuzlu bir ictimai təşkilatdır. Təşkilatın həyata keçirdiyi ən böyük layihə Turan Qurultayıdır. Vəqfin sədri Andras Biro Zsolt, Macarıstan parlamentinin vitse-spikeri, bu Qurultayın əsas hamiçisi kimi tanınan Sandor Lezakdır.
Oğuz
