Xəbər verdiyimiz kimi, taksi sürücülərinin hazırlıq səviyyəsini Dövlət İmtahan Mərkəzi (DİM) qiymətləndirəcək. Təxminən 1-2 aydan sonra prosesin tam detalları bəlli olacaq. Təlimləri Azərbaycan Yerüstü Nəqliyyat Agentliyi (AYNA), qiymətləndirilməsini isə DİM həyata keçirəcək. Aparılmış qiymətləndirmənin nəticəsinə uyğun olaraq Dövlət İmtahan Mərkəzi tərəfindən sürücüyə 7 il müddətinə qüvvədə olan sənəd təqdim ediləcək.

Məsələ ilə bağlı Ednews-a fikirlərini bölüşən nəqliyyat üzrə ekspert Aslan Əsədov bildirib ki, yaxın zamanlarda taksi sürücüsü kimi fəaliyyət göstərmək istəyən şəxslər DİM-in təşkil etdiyi imtahanlardan keçməli olacaqlar:

“Hal-hazırda müzakirələr gedir. Konkret olaraq proqram tətbiq edilməyib. Suallar hazırlanmayıb və baza sistemi formalaşmayıb. Onun üçün  hələ ki, nə DİM-dən nə də AYNA-dan bir məlumat verilməyib”.

Ekspert vurğuladı ki, burada hazırlanacaq sualların əsas mahiyyəti birbaşa nəqliyyat vasitəsinin idarə edilməsi, sağlamlıq durumu ilə bağlı, qəza zamanı müəyyən risklərdən yayınma və.s mövzularında olacaq.

“Çünki burada birbaşa söhbət sərnişindaşımadan gedir. Bundan əlavə imtahandan əvvəl arzu edən şəxslər AYNA-nın təşkil etdiyi kursları da bitirməlidir”.

Aynurə İsmayıl