Son günlər paytaxtın bəzi ərazilərində su təchizatı ilə bağlı çətinliklər müşahidə olunur.
Yay mövsümündə tələbatın artması fonunda suya əlçatanlığın azalması həm mövcud infrastrukturun vəziyyətini, həm də resursların idarə olunması məsələsini yenidən gündəmə gətirir. Bu isə su tariflərinin dəyişməsi və problemin hansı yollarla həll edilə biləcəyi ilə bağlı suallar doğurur.
Mövzu ilə bağlı EDnews-a danışan ekoloq Cəmşid Bəxtiyar qeyd edib ki, tariflərin artırılması belə bir prosesdə yeganə çıxış yolu deyil və bu, avtomatik olaraq problemin həllinə gətirib çıxarmır:
"Belə qərarlar, hökumətin sosial siyasətindən, su təchizatı qurumlarının maya dəyərindən və tənzimləyici orqanların mövqeyindən də asılıdır. Problemin həlli üçün bir neçə istiqamət nəzərdən keçirilə bilər. İlk növbədə, su şəbəkəsində itkilərin azaldılmasına nail olmaq lazımdır. Bir çox hallarda suyun əhəmiyyətli hissəsi köhnə borular və sızmalar səbəbindən istehlakçıya çatmadan itir. Su ehtiyatlarının artırılması da mühüm çıxış yollarından biridir. Yeni su anbarlarının yaradılması, mövcud mənbələrin daha səmərəli idarə olunması və alternativ su mənbələrindən istifadə problemin həllində effektiv nəticələr verə bilər".
Ekoloq hesab edir ki, sözügedən prosesdə tələbatın idarə edilməsi də vacib istiqamətlərdən biridir:
"Bu tədbirlər paralel şəkildə həyata keçirilməlidir. Suya qənaət edən avadanlıqların təşviqi, yaşıllıqların daha səmərəli üsullarla, məsələn, çiləmə və damcı üsulu ilə suvarılması mühüm əhəmiyyət daşıyır. Eyni zamanda, içməli sudan başqa məqsədlər üçün istifadə minimuma endirilməlidir. Məsələn, dekorativ yaşıllıqların və fəvvarələrin su ilə təchizatında içməli sudan istifadə olunmaması su ehtiyatlarının qorunmasına ciddi töhfə verə bilər.
Ekoloqun sözlərinə görə, su sərfiyyatının yüksək olduğu sahələrdən biri də avtomobillərin yuyulmasıdır:
"Bu məqsədlə içməli sudan istifadə olunmamalıdır. Onun əvəzinə texniki sulardan, yağış sularından və təmizləyici qurğulardan keçmiş sulardan istifadə edilə bilər. Belə suların yaşıllıqların suvarılmasında və avtomobillərin yuyulmasında tətbiqi içməli suya olan tələbatın azalmasına kömək edə bilər. Problemin həllində digər köməkçi istiqamət əhalinin gündəlik su sərfiyyatını azaltmağa təşviq edilməsidir. Buna isə maarifləndirmə yolu ilə nail olmaq mümkündür.
Tarif məsələsinə gəldikdə isə ekoloq onu da əlavə edib ki, bir çox ölkələrdə sosial ədaləti qorumaq üçün pilləli tarif sistemi tətbiq olunur:
"Ölkədə də bu üsula müraciət edilə bilər. Elektrik enerjisi və qaz istehlakında bu yanaşmadan istifadə olunur. Oxşar model su təchizatında da tətbiq edilə bilər. Yəni əsas məişət ehtiyacları üçün müəyyən həcmdə su daha ucuz qiymətə satıla, normadan artıq istehlak isə daha yüksək tariflə hesablana bilər. Bu yanaşma həm suya qənaəti stimullaşdırar, həm də aztəminatlı ailələrin sosial müdafiəsinə kömək edər".
Mövzu ilə əlaqədar İri Şəhərlərin Birləşmiş Su Təchizatı Xidmətindən EDnews-un sorğusuna cavab olaraq bildirilib ki, hazırda tarif artımı ilə bağlı hər hansı məlumat mövcud deyil.
Aytac Kərimova | EDnews
