İspaniya məhkəməsi Baş nazir Pedro Sançezin həyat yoldaşı Beqona Qomezin 7–8 iyul tarixlərində NATO Sammitində iştirak etmək üçün Türkiyəyə səfərinə icazə verməyib.
EDnews xəbər verir ki, məhkəmənin qərarına əsasən, Qomezin Ankaraya səfər etməsi qadağan olunub.
Bununla yanaşı, onun qızının məzuniyyət mərasimində iştirak etmək üçün Londona getməsinə icazə verilib. Səfərdən sonra isə pasportunu məhkəməyə təhvil verməsi tələb olunur.
Qeyd edək ki, hakim Xuan Karlos Peynado iyunun 20-də Beqona Qomez barəsində məhkəmə prosesinin başlanmasına qərar verib. Qadının pasportu müsadirə olunub və onun ölkədən çıxışına məhdudiyyət qoyulub.
Beqona Qomezə qarşı istintaq 2024-cü ildə başlanıb. O, mənimsəmə, vəzifə və əlaqələrdən sui-istifadə, eləcə də biznes korrupsiyası ilə bağlı ittihamlarla üzləşir.
İspaniya Prokurorluğu işin bağlanmasını tələb edib və məhkəmə prosesi başlasa belə, Qomezin bəraət almasını istəyəcəyini bildirib. Digər tərəfdən, işi qaldıran ifrat sağçı Hazte Oír təşkilatı onun 24 il müddətinə azadlıqdan məhrum edilməsini tələb edir.
