Fevralın 3-də Suriyanın İdlib bölgəsində Türk ordusu və Suriya ordusu arasında baş vermiş qarşıdurmada 6 Türk əsgəri şəhid olub və 7 nəfəri isə yaralanıb. Bu hadisədən sonra Türk ordusu və Əsəd qüvvələri arasında vəziyyət daha da gərginləşib. Türk ordusu mövqelərinə qarşı edilmiş hücumlara cavab olaraq havadan və qurudan Suriya ordusuna ağır zərbələr endirib. Türkiyə höküməti cavab zərbələrini davam etdirəcəyini bildirib.
Türk tədqiqatçı Yalçın Sarıkaya Suriyada gərginliyin artması ilə əlaqədar Eurasia Diary-ə açıqlama verib. Yalçın Sarıkaya Türk Akademik Siyasi, Sosial və Strateji Araşdırma Fondunda xarici siyasət üzrə koordinatordur.
Yalçın Sarıkaya Eurasia Diary-yə açıqlamasında önəmli məsələlərə toxunub. Bura Türkiyənin Suriyada hansı növbəti addımları atacağı, həmçinin Türk ordusunun Suriya ordusuna qarşı cavab zərbəsinin Türkiyə-Rusiya əlaqələrinə necə təsir edəcəyi daxildir.
Yalçın Sarıkaya ilk növbədə Suriyanın Türkiyə üçün əhəmiyyətli bölgə olduğunu bildirdi. Ona görə ki, bu bölgədə Suriya PKK-sı hesab edilən, Kürd terrorçu qruplaşması YPG Türkiyənin sərhəd bölgələrinə daima hücumlar təşkil edirdi.
“Türkiyə Silahlı Qüvvələri Suriyanın şimalında Fərat Qalxanı, Zeytun Budağı və Sülh Bulağı adlı hərbi əməliyyatlarını müvəfəqiyyətlə həyata keçirtməklə terrorçu qruplaşmaları məğlub etdi”, -deyə Sarıkaya qeyd etdi.
Türk tədqiqatçının verdiyi məlumata görə, Türkiyə iki səbəbdən dolayı Suriyanın İdlib zonasında hərbi əməliyyatlar aparmaq istəyir. Birinci səbəb, İdlib zonasında Əl-Nusra daxil olmaqla bir sıra terrorçu qruplaşmaların mövcud olmasıdır. İkinci səbəb isə həmin bölgədə bir milyona yaxın insanın zərər çəkməsidir.
“Türkiyə Hələb şəhərindən sakinlərin təxliyə edilməsində öz öhdəliyini yerinə yetirib. Lakin, Rusiyanın və ABŞ-ın Suriyanın Təl-Rifat və Münbiç vilayətlərində öz öhdəliklərini yerinə yetirdiklərini görmürük”,-deyə Sarıkaya bildirib.
“Biz əmin olmalıyıq ki, Türkiyə hücumla bağlı bütün hərbi seçimləri nəzərdən keçirib. Həmçinin Moskvanın bu hadisə ilə bağlı bəyanatlardan aydın olur ki, Rusiya Türkiyəni itirmək istəmir”- Sarıkaya əlavə edib.
Cənab Yalçın Sarıkaya Türkiyənin Əsəd qüvvələrinə qarşı silahlı cavabın Türkiyə-Rusiya münasibərlərini gərginləşdirə bilməsi ehtimalını rədd edir. Yalçın bəy qeyd edir ki, Türkiyənin ABŞ ilə əlaqələrində problemlərin olması və Türkiyə-ABŞ əlaqələrində hazırki vəziyyət Türkiyə-Rusiya münasibətlərində müsbət irəliləyişə səbəb olur. Moskvaya gəlincə isə, Ankara və Vaşinqton arasında əlaqələrdə gedən prosesləri yaxından izləyir.
Sarıkaya onu da əlavə etdi ki, Türkiyənin Ukrayna məsələsində mövqeyi və Ankara tərəfindən verilən son bəyanatlar Rusiyanı qəzəbləndirib. Rusiya da bununla əlaqədar Türkiyəyə mesaj göndərib. Suriyada baş verən gərginlik bunu təsdiq edir.
“Türkiyə və Rusiya arasında problemlərin olmasına baxmayaraq, hər iki ölkə arasında qarşılıqlı iqtisadi əlaqələr mövcuddur. İdlibdə Türk ordusu və Əsəd qüvvələri arasında hərbi qarşıdurmanın Türkiyə-Rusiya müharibəsinə gətirib çıxaracağı ehtimalı həqiqətdən uzaqdır”,-deyə Sarıkaya vurğulayıb.
Bundan əlavə, Sarıkaya Astana-Soçi danışıqlarının Suriyada sülhün və stabilliyin möhkəmləndirilməsində vacib rol oynadığını hesab edir. Tərəflər arasında anlaşmanın olmaması regionda vəziyyəti gərginləşdirir. Gərginliyin artması Türkiyə və Suriya üçün problemlər yaradır.
“Astana-Soçi anlaşması hələ qüvvədədir. Vəziyyətin gərgin olduğu bölgələrdə Türkiyənin post patrulları mövcuddur. Lakin Əsəd qüvvələri Türkiyəyə məxsus bəzi post patrulları mühasirəyə alıb və vəziyyəti gərginləşdirib”.
Yalçın Sarıkaya sonda qeyd etdi ki, münaqişəli zonalarda sakinlərin terrorçu qruplaşmalardan zərər çəkməsi və bir milyona yaxın şəxsin Türkiyə sərhədinə irəliləməsi Ankaranı narahat edir.
Yunis ABDULLAYEV