Qətər Xarici İşlər Nazirliyi son vaxtlar dünya çempionatını boykot edənlərə xitabən bildirib ki, bu çağırışlar məntiqli deyil və burada riyakarlıq mövcuddur.

Ednews  xəbər verir ki, Qətərin xarici işlər naziri Şeyx Məhəmməd bin Əbdül Rəhman Əl Tani Fransanın “Le Monde” qəzetinə müsahibəsi zamanı, ölkəsində keçirilən dünya çempionatının təşkilinə dəstək olduğunu bildirib.

 O, dünya çempionatına boykot edənlərin son çağırışlarına belə cavab verib: “Dünya çempionatına boykot etmək üçün göstərilən səbəbləri əsaslı və məntiqli hesab etmirəm. Açığı, təəssüf hiss ilə qeyd etmək istərdim ki, bizə qarşı törədilən bu hücumlarda çox riyakarlıqlar vardır.

O, həmçinin qeyd edib ki, bütün təxribatlara baxmayaraq, bütün dünya bu oyunu səbirsizliklə gözləyir.

“Biletlərin 97%-dən çoxu artıq satılıb. Fransa ən çox bilet alan Avropa ölkələrindəndir”.

Stadion tikintisində minlərlə insanın ölüm xəbəri haqqında yayılan iddialara isə qətərli nazir cavab olaraq bildirib ki, hər ölüm kədərlidir. 

“Qətərdə biz hər il ölüm statistikasını toplayıb dərc edirik. Təbii ki, bu ölümlərin əksəriyyəti işlə bağlı deyil. Bu səbəbdən medianın verdiyi rəqəmlər yanlışdır”. 

O, həmçinin Beynəlxalq Amnistiya Təşkilatının Dünya Kuboku ərəfəsində hüquqları pozulan işçilər üçün kompensasiya fondu yaratmaq üçün dünya çempionatından əldə etdiyi 6 milyard dollarlıq mənfəətdən 400 milyon dolların ayrılması ilə bağlı sualara da cavab verib.

 “Belə bir fond artıq mövcuddur və özünü sübuta yetirib. Ötən il bu fonddan 350 milyon dollar vəsait ayrılıb. Bu pullar maaşları kəsilən və məhkəmə çəkişmələri ilə üzləşən, iş yerində yaralanan və ölən işçilərin ailələrinə ödənilir”.

Rəna Mürşüd