“Belə təəssürat yaranır ki, Ermənistan rəhbərliyi İran qoşunlarının Zəngəzura yerləşdirilməsi ideyasından ehtiyatlanır”.
Ednews xəbər verir ki, bu fikirləri sabiq xarici işlər naziri Tofiq Zülfüqarov sosial şəbəkə hesabında paylaşıb.
Keçmiş nazir İran və Ermənistan arasında hərbi əməkdaşlıq perspektivlərinə diqqət çəkib:
“Tez-tez və “vizual” olaraq qarşılıqlı, deklorativ, siyasi təkliflərə baxmayaraq, Tehran və İrəvan arasında “qarşılıqlı yardım haqqında” hər hansı ikitərəfli sazişin hazırlanması barədə məlumat yoxdur. Yəni, İran hərbçisinin Ermənistan ərazisində görünməsi üçün heç bir hüquqi əsas yaradılmayıb. Digər tərəfdən, erməni təxribatı olacağı təqdirdə, Azərbaycan hərbçisi Zəngəzurda düşmənin atəş nöqtələrini sıxışdırmağa məcbur olacaqsa, İran ordusunun hərbçisi orada ancaq işğalçı kimi peyda ola bilər”.
Tofiq Zülfüqarovun sözlərinğə görə, İranın Zəngəzurda öz qüvvələrini yerləşdirmək ehtimalının baş tutmamasının səbələri var.
“Ermənistan rəhbərliyi buna hazır deyil. Çünki İran qoşunlarının ərazisinə yerləşdirilməsi Ermənistanın Qərb və Rusiya ilə münasibətlər sisteminin dağılmasına gətirib çıxaracaq. İran rəhbərliyi hazır deyil. Ona görə ki, bu addım üçün Qərb və Rusiya Federasiyası ilə qarşıdurmaya, ən əsası isə ölkə əhalisinin etirazlarına və siyasi elitada etnik zəmində parçalanmaya hazır olmaq lazım gələcək”.
O bildirib ki, “müttəfiqliyin” yeganə forması mümkün görünür. O da, ərəb ölkələrindən və İranın özündən “İran vaqnerçiləri”nin (İranın proksi qüvvələri) əraziyə cəlb olunmasından ibarətdir. Belə bir perspektiv də, yumşaq desək, Ermənistanın özü üçün belə nikbin görünmür.
Aysel Şahmar
