Moldova Respublikasının tərkibində muxtar ərazi qurumu olan Qaqauziyada (Qaqauz Yeri) region rəhbəri seçkilərinin nəticələrinə görə gərgin vəziyyət yaranıb.
Ednews xəbər verir ki, bunu politoloq İlqar Vəlizadə feysbuk hesabında paylaşıb.
O bildirib ki, Seçkidə 27 376 səs (52 faiz) toplayan Şor partiyasının namizədi Yevheniya Hutsul qalib gəlib.
“Bütün hesablamalara görə, Qaqauziyadakı müşahidəçilərdə rusiyayönlü fikirlər üstünlük təşkil edir ki, bu da muxtariyyət meyllərini gücləndirir. Şor partiyasının sponsoru isə Rusiyada yaşayan, ABŞ sanksiyaları altında olan moldovalı iş adamı İlan Şordur.
Maraqlıdır ki, türklər, azərbaycanlılar, türkmənlərlə eyni oğuz dil qrupuna mənsub olan qaqauzlar da Ankara tərəfindən qohum etnik azlıqlara dəstək siyasətinin tərkib hissəsi kimi qəbul edilir. Bəzi versiyalara görə, Qaqauziyanın Moldova tərkibində muxtariyyət statusunu Moskva yox, Ankara əldə edib”.
Politoloq Türkiyənin o zamankı prezidenti Süleyman Dəmirəl 1994-cü ildə Qaqauziyaya səfəri zamanı demişdi: “Sizin muxtariyyətə sahib olmanızın təminatı Türkiyə olacaq” diqqətə çatdırıb.
O qeyd edib ki, gələcəkdə bu region Moldova ilə Türkiyə arasında “körpü” rolunu oynamalıdır və Ankara ilə Kişinyov arasında münasibətlər sonuncunun qaqauzlara yanaşması ilə müəyyənləşəcək. Həmin səfərdən 6 ay sonra Moldova parlamenti “ATU Qaqauziyanın xüsusi hüquqi statusu haqqında” qanun qəbul etdi.
“Hazırda Türkiyənin iqtisadi varlığı bölgədə böyük ölçüdə hiss olunur. Türkiyə prezidenti R.T. Ərdoğan bir neçə il əvvəl Qaqauziyanın o vaxtkı lideri İrina Vlaxı qəbul edib. Azərbaycanın da muxtar vilayət arasında xüsusi əlaqələri var. Bakıda keçirilən “Yeni xarici siyasət” qlobal forumu çərçivəsində İrina Vlax Azərbaycan Prezidenti İlham Əliyevlə də görüşüb. Hətta Qaqauziya ilə Azərbaycanın Qəbələ rayonu arasında Azərbaycan-Moldova ticarət-iqtisadi əməkdaşlıq proqramı çərçivəsində əməkdaşlıq haqqında sazişin imzalanması da nəzərdə tutulmuşdu”.
Aysel Şahmar