İsrailin Nagel Komitəsi öz hesabatında İsrailin Türkiyə ilə birbaşa münaqişəyə hazırlaşmalı olduğunu vurğulayıb.
"EDnyus" xəbər verir ki, İsrailin baş naziri Benyamin Netanyahu hesabatı dəyərləndirərək “Arenaya yeni qüvvələr daxil olur və gözlənilməz vəziyyətlərə hazır olmalıyıq” deyib.
Hesabatda 15 il əvvəl İsrailin baş naziri Netanyahu tərəfindən yaradılan və prof. Yakob Nagelin sədrlik etdiyi Nagel Komissiyasının Türkiyə ilə potensial münaqişəyə hazırlıq məsələsinə toxunulub. Hesabatda həmçinin, Türkiyənin dəstəklədiyi qüvvələrin regional qeyri-sabitliyi artırmaq potensialına malik olduğu və bu təhdidin İranın yaratdığı təhlükədən daha ciddi olacağı bildirilir.
Netanyahu yaxın Şərqdə baş verən dəyişiklikləri nəzərə alaraq, İranın uzun müddət ən böyük təhlükə olduğunu, lakin indi yeni güclərin meydana çıxdığını və bu güclərə qarşı hazırlıqlı olmağın vacibliyini qeyd edib. O, hesabatın İsrailin gələcəyini təmin etməyə yönəlmiş bir yol xəritəsi olduğunu bildirib.
