İki nümayəndə heyəti Ukraynadakı münaqişənin həlli ilə bağlı 12 saatdan çox danışıqlar aparıb. Ukrayna münaqişəsinin nizamlanması və Qara dənizdə dəniz təhlükəsizliyi məsələlərinə yönəlmiş yüksək səviyyəli Rusiya və ABŞ rəsmiləri arasındakı danışıqlar Səudiyyə Ərəbistanının paytaxtı Ər-Riyadda 12 saatdan çox davam etdikdən sonra başa çatdı.
Rusiyanın RİA Novosti və TASS informasiya agentlikləri mənbələrə istinadən bildirir ki, danışıqların yekunlarına dair birgə bəyanatın çərşənbə axşamı yayımlanması gözlənilir.
Rusiya Xarici İşlər Nazirliyi danışıqların başa çatdığını əks etdirən qısa video yayımlayıb. “Rusiya-Amerika məsləhətləşmələri başa çatıb”, – nazirlik bildirib, lakin əlavə məlumat verməyib.
Eyni zamanda, Ağ Evin mənbəsi Reuters agentliyinə bildirib ki, Ər-Riyadda aparılan danışıqlarda irəliləyiş əldə edildikdən sonra “yaxın gələcəkdə müsbət açıqlama” gözlənilir.
Rusiya nümayəndə heyətinin üzvü, təcrübəli diplomat və parlamentin Beynəlxalq Münasibətlər Komitəsinin sədri Qriqori Karasin Ər-Riyad danışıqlarını “yaradıcı”, lakin eyni zamanda “texniki” adlandırıb.
“Bütün danışıqların nəticəsi olaraq mühüm sənədlər və ya razılaşmalar əldə edilmir. Əsas məsələ dialoqu qoruyub saxlamaq və bir-birimizin mövqeyini anlamaqdır. Bu baxımdan biz uğur qazanırıq”, – Karasin jurnalistlərə danışıqların fasiləsi zamanı bildirib.
Danışıqlar əsasən Qara dənizdə dəniz təhlükəsizliyi və BMT və Türkiyənin vasitəçiliyi ilə həyata keçirilmiş, lakin 2023-cü ilin iyul ayında Rusiya tərəfindən dayandırılmış Qara Dəniz Taxıl Təşəbbüsünün bərpası perspektivləri ətrafında cərəyan edib. Rusiya Qərbin öhdəliklərini yerinə yetirmədiyini əsas gətirərək bu təşəbbüsdən geri çəkilmişdi.
Kremlin mətbuat katibi Dmitri Peskov da bu məsələni təsdiqləyərək bildirib: “Əgər siz xatırlayırsınızsa, bizim üzərimizə götürdüyümüz mühüm öhdəliklər var idi, lakin onlar yerinə yetirilmədi. Bu məsələ hələ də gündəmdə qalır.”
ABŞ-ın prezidenti Donald Tramp isə Moskva ilə Kiyev arasında daha geniş atəşkəs əldə etmək səyləri çərçivəsində bu razılaşmanın yenidən nəzərdən keçirilməsi təklifini irəli sürüb, – deyə Peskov əlavə edib.
Fatimə Şükürova // EDnews
