Danimarkanın Kopenhagen və Orxus şəhərlərində ABŞ-nin Qrenlandiya siyasətinə qarşı genişmiqyaslı etiraz aksiyaları keçirilib.
EDnews xəbər verir ki, paytaxtda ABŞ səfirliyi önünə toplaşan 800-1000 nəfər “Qrenlandiya Qrenlandiyalılara məxsusdur” şüarı ilə etiraz edib.
Aksiya iştirakçıları ABŞ Prezidenti Donald Trampın Qrenlandiya üzərində nəzarəti gücləndirmək niyyəti ilə bağlı açıqlamalarına qarşı çıxdıqlarını bildiriblər.
Etirazların təşkilatçılarından biri olan Karen Littauer vurğulayıb ki, Vaşinqtonun həm Qrenlandiya, həm də Danimarka üzərində təzyiq göstərməsi qəbuledilməzdir. “Bu siyasət kobud bir müdaxilədir və biz bunun normal qəbul olunmaması üçün buradayıq,” - deyə o qeyd edib.
Qeyd edək ki, aksiyalar ABŞ-nin vitse-prezidenti Cey Di Vensin martın 28-də Vaşinqtonun Qrenlandiyadakı Pituffik hərbi bazasında təhlükəsizlik tədbirlərinin kifayət qədər olmaması ilə bağlı Danimarkanı tənqid etməsindən sonra baş verib. Danimarkanın Baş naziri Mette Frederiksen isə ABŞ tərəfindən edilən bu tənqidləri əsassız adlandırıb.
Şəms Qasımlı // EDnews
