ABŞ prezidenti Donald Tramp Federal Ehtiyat Sisteminin (FED) rəhbəri Cerom Pauellə qarşı tənqidlərini davam etdirərək, onun faiz dərəcələrini aşağı salmaması səbəbilə ölkəyə böyük iqtisadi faydalar qazandıra bilmədiyini bildirib. Tramp bildirib ki, bir qələm zərbəsi ilə faizləri azalda və ölkəyə ildə 100 milyardlarla dollar qazandıra biləcək bir adam var, amma o, axmağın biridir.
“EDnews” xəbər verir ki, Tramp Pauellin yerinə faiz dərəcələrini azaldacaq yeni bir rəhbər təyin etmək istədiyini bildirib. O, mövcud səviyyədə faizləri qoruyacaq bir rəhbər istəmədiyini açıqlayıb.
Tramp bu açıqlamaları Oval Ofisdə keçirdiyi mətbuat konfransında jurnalistlərin suallarını cavablandırarkən verib.
Kanada ilə ticarət danışıqlarını niyə dayandırdığı və hansı tarif nisbətləri tətbiq ediləcəyi ilə bağlı sualı cavablandıran Tramp bu sözləri deyib:
"Kanada üzərində iqtisadi baxımdan çox böyük gücümüz var. Bu gücü istifadə etməməyi seçərdim, amma Avropanı təqlid edərək texnologiya şirkətlərimizə qarşı çox pis bir şey - rəqəmsal xidmət vergisi təyin etdilər. Bu, nə Avropa, nə də Kanada üçün yaxşı olmayacaq. Bu addımla axmaqlıq etdilər. Buna görə də Kanada özünü düzəldənə qədər bütün danışıqları dayandıracağımızı bildirdim".
Kanadanın hansı addımı atarsa fikrinin dəyişə biləcəyi ilə bağlı suala cavab olaraq Tramp bildirib:
"Amerikalı şirkətlərə çox ağır vergi qoydular. Düşünürəm ki, bu vergini ləğv edə bilərlər. Ləğv edəcəklər, amma bu, mənim üçün fərq etməz. Bütün kartlar bizim əlimizdədir".
Avropa İttifaqının (Aİ) ABŞ-dan faydalanmaq məqsədilə qurulduğunu iddia edən Tramp, qurumun uzun illər ABŞ-a ədalətsiz münasibət sərgilədiyini, lakin onun sistemi başa düşdüyü üçün fərqli yanaşdığını deyib.
Tramp əlavə edib ki, Aİ 50 faiz gömrük vergisi təhdidindən sonra danışıqlara açıq oldu: "Mən bunu deyən kimi danışıqlar masasına gəldilər".
Prezident Aİ-nin ədalətsiz vergi siyasəti apardığını, ABŞ şirkətlərinə qarşı məhkəmə iddiaları qaldırdığını və cərimələr tətbiq etdiyini də bildirib:
"Bu cəza tədbirlərini ABŞ şirkətlərinə tətbiq etmələrini istəmirəm. Əgər hansısa şirkətə cərimə tətbiq ediləcəksə, bu, bizim tərəfimizdən olmalıdır. Aİ çox pisdir, bu aydındır, amma çox tezliklə bu qədər pis olmamağı öyrənəcəklər. Onlar bunun olacağını bilirlər"
FED rəhbəri Cerom Pauellə bağlı fikirlərini davam etdirən Tramp deyib:
"İstefa verməsini çox istərdim, çünki dəhşətli iş gördü".
Prezident ölkədə inflyasiyanın azaldılması üçün mühüm addımlar atıldığını və demək olar ki, inflyasiyanın olmadığını deyib. Tramp Pauellə bağlı sərt tənqidlərini bu sözlərlə yekunlaşdırıb:
"Əlimizdə bir inadcıl qatır və böyük səhv edən axmaq bir adam var. Səhv edir və bu illərlə davam edir. Yerinə gələcək şəxs faizləri azaldacaq. Əgər kiminsə faizləri hazırkı səviyyədə saxlayacağını düşünsəm, onu təyin etməyəcəyəm. Faizləri azaltmaq istəyən birini gətirəcəyəm. Onlardan kənarda çox var".
