Pakistanın təhlükəli sərhəd bölgəsi olan Şimali Vəziristanda gərginlik yenidən alovlanıb. Əfqanıstanla sərhəddə yerləşən strateji keçid məntəqəsinə silahlı qruplaşma tərəfindən təşkil edilən hücum nəticəsində Pakistan ordusunun dörd hərbçisi həyatını itirib.

EDnews yerli hərbi mənbələrə istinadən xəbər verir ki, ağır silahlarla silahlanmış bir qrup terrorçu gecə saatlarında sərhəd postuna hücum edib. Pakistan ordusunun verdiyi məlumata görə, hərbçilər hücumu qətiyyətlə dəf edərək altı hücumçunu məhv edib. Əməliyyat zamanı tərəflər arasında bir neçə saat davam edən atışma qeydə alınıb.

Hadisə zamanı bölgəyə əlavə hərbi qüvvələr cəlb olunub. Pakistan Silahlı Qüvvələri hücumun qarşısını almaqla yanaşı, ərazidə genişmiqyaslı antiterror əməliyyatlarına başlayıb. Məlumata görə, terrorçular sərhəd postunu ələ keçirmək və oradakı nəzarəti ələ almaq niyyətində olublar.

Mənbələr bildirir ki, Pakistan-Əfqanıstan sərhədi boyunca son aylarda oxşar hücumların sayı artmaqdadır. Pakistan tərəfi bu hücumlarda əsasən Əfqanıstan ərazisində yerləşən silahlı qruplaşmaların iştirak etdiyini iddia edir. Tələfat və təhlükənin artması regionda təhlükəsizlik çağırışlarını gündəmə gətirib.

Xatırladaq ki, Şimali Vəziristan regionu uzun illərdir radikal silahlı qruplaşmaların fəaliyyət göstərdiyi, sərhədin qeyri-sabit və asan keçilən olması səbəbilə təhlükəsizlik qüvvələri üçün strateji əhəmiyyət daşıyan ərazidir.

Mütəxəssislər hesab edir ki, bu kimi hücumlar təkcə sərhəd təhlükəsizliyi deyil, həm də Pakistan–Əfqanıstan münasibətlərindəki onsuz da gərgin olan vəziyyətə mənfi təsir göstərməkdədir. Rəsmi İslamabad bu insidentdən sonra regionda nəzarəti gücləndirməyə və terrora qarşı mübarizəni daha sərt formada davam etdirməyə qərarlıdır.

 Fatıma Şükürova // EDnews