"Bəli, bunu gözləyirdim, biraz gecikib, əlbəttə".
Bu sözləri Ednews-a açıqlaması zamanı Əməkdar incəsənət xadimi, yazıçı Vidadi Babanlı “Şərəf” ordeni ilə təltif olunması haqqında danışarkən deyib.
Maraqlı söhbət zamanı yazıçı müasir ədəbiyyatda olan bəzi məsələlərə də toxunub. O, son zamanlar ən çox müzakirə olunan fəxri adların verilməsi barədə də danışıb.
Çoxları bunun sovetdən qalma bir adət olduğunu deyir. Lakin...
Vidadi Babanlı düşünür ki, orden və fəxri adların verilməsi dövlət tərəfindən atılan doğru addımdır. Yazıçı bunu incəsənət adamlarına bir növ motivasiya kimi qiymətləndirib.
"Bu Sovet dönəmindən qalmayıb, fəxri adlarla təltifolunma hər zaman olub. Hətta Mirzə Fətəli Axundova "George ordeni" təqdim edilib, Nizami Gəncəvi Qızıl Arslan tərəfindən mükafatlandırılıb. Mən bu adların verilməsini müsbət qiymətləndirirəm. Bu insana ruh verir, daha da insanı coşdurur. Bu, özü yaradıcılığa bir qiymətdir. Yaradıcılığa qiymət veriləndə adam ilhama gəlir, daha yaxşı çalışmağa səy göstərir”.
Söhbət zamanı V.Babanlı daha bir məsələyə Azərbaycan yazarlarının kifayət qədər məşhurluq qazanmaması barədə gəzən söhbətlərə də aydınlıq gətirib. Yazıçı insanların xarici ədəbiyyatı daha çox oxuması və təbliğ etməsini yerli yazarların istedadıla yox, adi həvəslə yazılmasıyla əlaqələndirib.
"Hər yazan yazıçı, şair olmur. Müasir dövrdə də yüzlərlə adam ədəbiyyata gəlir, onların arasından əsl istedadlar qalır, qalanları yarıyolda bu sənəti tərk edirlər. Elə-belə həvəslə 1-2 əsər yazırlar, sonra gerisi gəlmir. Ona görə də cavanlar həvəs göstərirlər, amma sonra istedad olmayanda yarıqolda qalırlar. Mənim "Vicdan susanda" əsərim 55 il əvvəl yazılıb, hələ də nəşriyyatlar məndən bu əsəri istəyirlər. Bir sözlə, bu əsərdən asılıdır - istedadla yazılıb, yoxsa adi həvəslə. Bizim dövrümüzdə də ədəbiyyata yetəri qədər insan gəlmişdi. Zamanın ələyindən ələndikdən sonra ədəbiyyatda 4-5 nəfər qaldıq. Bu, həmişə belə olub. Adi bir həvəslə ədəbiyyata gələnlər, hər zaman yarıyolda qalırlar".
Yazıçının fikrincə, xaricdə də yerli ədəbiyyata münasibət ölkəmizdəki kimidir.
"Xarici ədəbiyyatdan istedadlı yazarların tərcümə edilən əsərləri çox oxunur. Çünki, maraqla yazılır və uzun illər, əsrlər keçməsinə baxmayaraq oxunaqlı nəşrlərdir. Bizim də elə əsərlərimiz var ki üzərindən illər keçməsinə baxmayaraq, bu gün də oxucu kütləsinin marağındadır. Əlbəttə, bu hardasa 10%-i təşkil edir və 90%-i kənarda qalır. Bu, həmişə belə olub. Xaricdə də bu qayda belədir. Orda da çox yazarlar var ancaq əsl istedadlı yazarların əsərləri oxunur".
Bəs, Vidadi Babanlı müasir ədəbiyyat nümayəndəlrimizdən kimlərin əsərlərini oxuyur?
Yazıçı bu suala cavab olaraq bildirib ki, son dövrlər yaşadığı sağlamlıq problemləri ilə əlaqədar kitab oxumaqda çətinlik çəkir. O, bu səbəblə gənc yazarların əsərlərini oxuya bilmədiyini ifadə edib.
"Mənim uzun müddətdir gözlərim yaxşı görmür, oxuya bilmirəm. Hətta son əsərimi də qızlarıma diktə edərək yazmışam. Diktə ilə də əsər yazmaq olduqca çətindir. Amma biz bunu etdik və alındı”.
Yazıçıya aprelin 28-də Əməkdar incəsənət xadimi, yazıçı Vidadi Babanlıya "Şərəf" ordeni təqdim edilib.
Xatırladaq ki, o, Prezident İlham Əliyevin sərəncamı ilə Azərbaycan incəsənətində göstərdiyi xidmətlərinə görə, "Şərəf" ordeninə layiq görülüb.
Ülkər İsmayılzadə
