Xəbər verdiyimiz kimi, Azərbaycanda yeni vergi güzəştləri tətbiq olunacaq.
Layihəyə əsasən, texnologiyalar parkından kənar fəaliyyət göstərən sistem inteqrasiyası, proqram təminatının hazırlanması və inkişaf etdirilməsi fəaliyyətini həyata keçirən vergi ödəyicilərində işləyən fiziki şəxslərin muzdlu işdən əldə edilən aylıq gəlirlərindən gəlir vergisi 2023-cü il yanvarın 1-dən 3 il müddətində aylıq gəlir 8000 manatadək olduqda 0 faiz, 8000 manatdan çox olan məbləğin 5 faizi, 2026-cı il yanvarın 1-dən 7 il müddətində aylıq gəlirin 5 faizi həcmində müəyyənləşir. Bu o deməkdir ki, gələn ildən növbəti 3 il müddətində sistem inteqrasiyası, proqram təminatının hazırlanması və inkişaf etdirilməsi fəaliyyətini həyata keçirənlərin 8 min manatadək olan gəlirləri vergidən azad olunacaq. 2026-cı ildən sonra 7 illik müddətində cəmi 5 faizlik gəlir vergisi tətbiq olunacaq.
İqtisadçı-ekspert Günay Hüseynova yeni vergi güzəştlərini Ednews-a şərh edib. Onun sözlərinə görə, 2000-ci illərin ortalarından başlayaraq texnologiyanın inkişafı surətlə artmağa başladı. IT sahəsində böyük nailiyyətlər əldə edildi. Əsasən bu sahədə ixtisaslaşmış ölkələr dünyanın inkişaf etmiş ölkələridir. Bizim kimi inkişaf etməkdə olan ölkələr isə bu proseslərə inteqrasiya olur.
“2023-cü ildən etibarən bir sıra qanunlarda dəyişiklik və güzəştlər nəzərdə tutulur. Milli Məclisin plenar iclasında həmçinin müzakirəyə çıxarılıb. Ümumillikdə vergi məcəlləsi, Gömrük Tarifləri haqqında qanun və bununla əlaqədar digər qanunlarında dəyişiklik nəzərdə tutulub. Belə ki, informasiya Kommunikasiya Texnologiyalari sahəsində fəalliyyət göstərən fiziki-hüqqu şəxslərə, həmçinin şirkətin rezident və qeyri-rezident şəxslərinə müəyyən müddət vergidən azad olunma təklif edilib”.
Ekspert bildirib ki, bununla yanaşı Əcnəbi və Vətəndaşlığı olmayan şəxs (ƏVŞ) üçün çalışma icazəsi tələb olunmayacaq, yaşama icazəsi sənədi ilə IT sahəsində məşğul olacaqlar.
“Ölkəmizdə yetəri qədər mütəxəssis yoxdur. Bu sahəyə edilən güzəşt və vergidən azad olmalar xaricdə IT sahəsində fəaliyyət göstərən həmvətənlərimiz ölkəyə qayıtması üçün stimul ola bilər, həmçinin ƏVS-lərin şəxslərin iş iznindən azad olması bu sahə ilə məşğul olacaq şəxlər üçün bir növ təcrübə olar”.
Qeyd edək ki, təklif olunan dəyişikliklər sektorun inkişafı baxımdan vacib hesab olunur. Bunun eyni zamanda yeni xarici investisiyanın cəlbinə də şərait yaradacağı gözlənilir. Layihə komitədə dəstəklənərək Milli Məclisin plenar iclasına tövsiyyə olundu. Dəyişikliklərin gələn il yanvarın 1-dən qüvvəyə minəcəyi gözlənilir.
Oğuz Ayvaz
