Statistikaya görə, Azərbaycana turist axını 39%-dən çox artıb. Turistlərin sayının artması ölkə infrastrukturunun inkişaf etməsinə təkan verir. Bəs turistləri ölkəyə cəlb edən əsas faktorlar hansılardır? 

Mövzu ilə bağlı Ednews-a danışan turizm eksperti Ceyhun Aşurov bildirib ki, keçən il turizm üçün bərpa ili olub:

“Azərbaycanda keçən il turistlərin sayı kəskin artıb. 2023-cü il təkcə Azərbaycanda deyil, həm də bütün dünya ölkələrində turizmin bərpası ili kimi qiymətləndirilib. Həmin il dünya turizminin 95%-i bərpa olunub. Azərbaycanda yaxın on ildə bu artımın davam edəcəyi gözlənilir. Baxmayaraq ki, quru sərhədlərimiz bağlıdır, ölkəyə gələn turistlərin sayında artım nəzərə çarpıb. 

Əlbəttə ki, hazırda gəliş əsasən hava yolu ilə həyata keçirilir. Buna görə də Azərbaycan viza proseslərini asanlaşdırmağa çalışır. Bununla bağlı səfirliklər və hava limanlarının da üzərinə əlavə məsuliyyət düşür”. 

Ekspert Azərbaycanda turizmin inkişafı üçün bəzi layihələrin reallaşmasının gərəkli olduğundan da danışıb.

“Düşünürəm ki, gələcəkdə Bakıdan kənar hava limanlarında ucuz hava nəqliyyatının fəaliyyətə başlaması çox önəmlidir. Nəqliyyat vasitələrin əlçatanlığı turistlərin ölkənin bütün regionlarına səyahət etməsinə şərait yarada bilər. Bu, həm də ölkəyə gələnlərin sayını da artıracaq. 

Müxtəlif regionlarda rekreasiya resurslarının olması ölkənin turizm potensialını ön plana çıxara bilər. Bu resursların təkcə məhdud ərazilərdə yerləşməsi turizmə əngəl yaradır. Tarixi abidələrə zərər vurmadan müasir infrastrukturlar yaratmaq hər ölkədə turizm üçün ən parlaq fəaliyyət hesab olunur“.

Fərid