Azərbaycanda yeni bacarıqlara ehtiyac var və onların transformasiyası zəruridir.
“EDnews” xəbər verir ki, bunu iqtisadiyyat nazirinin müavini Səməd Bəşirli “4Sİ Akademiyası” çərçivəsində keçirilən “Milli Proqram” layihəsinin açılış mərasimində bildirib.
Onun sözlərinə görə, bu gün ölkəmizdə əmək bazarının tələblərinə uyğun kadrların hazırlanması diqqət mərkəzində saxlanılır, dövlət-özəl sektor əməkdaşlığı gücləndirilir, innovasiya ekosistemi yaradılır, texnoparklar, startap proqramları və rəqəmsal bacarıqlar üzrə təlim layihələri həyata keçirilir. Hər bir qurum üçün bacarıqların akkreditasiyası və “ömürboyu öyrənmə” prinsipinin təşviqi dövrün ən əsas prioritetlərindəndir.
"Bu gün açılış mərasiminə yığışdığımız 4Sİ Akademiyası çərçivəsində həyata keçirilən Milli Proqram layihəsi qeyd etdiyim bütün strateji məqsədlərə xidmət edir. 4SİM, Təhsilin İnkişafı Fondu və qlobal öyrənmə platforması olan "Coursera"nın birgə əməkdaşlığı ilə həyata keçirilən bu böyük Proqram gənclərimizin innovasiya və texnologiya sahəsində potensialını dəstəkləyir, müəllim və təlimçilərin bacarıqlarını artırır, tələbələrin əmək bazarının real tələbləri ilə uyğunlaşmasına öz töhfəsini verir. Layihənin sosial inklüzivlik və regionlar üzrə balanslı inkişaf prinsiplərini də özündə ehtiva edə bilməsi xüsusi təqdirəlayiqdir. Milli Proqramın artıq I mərhələsi yekunlaşıb və 6 həftə ərzində 14 000-dən çox sertifikat əldə edilib. Bu iştirakçıların layihəyə və öyrənməyə olan böyük maraq və həvəsinin göstəricisidir. Layihəyə dəstək verən bütün tərəfdaşlarımızı və komandamızı təbrik edir və növbəti mərhələlərdə uğurlar arzu edirəm",- deyə o qeyd edib.
Nazir müavini bildirib ki, əmək bazarında fundamental dəyişikliklər baş verir: "Qlobal miqyasda texnoloji tərəqqi, süni intellekt, avtomatlaşdırma, böyük verilənlərin analizi və rəqəmsal platformaların yayılması işçi qüvvəsinə olan tələbləri köklü şəkildə dəyişir. Dünya İqtisadi Forumunun 2025-ci il “Gələcəyin Peşələri” (Future of Jobs) hesabatına əsasən, 2030-cu ilə qədər 92 milyon iş yeri ləğv ediləcək, lakin 170 milyon yeni iş yeri yaradılacaq ki, bu da xalis 78 milyon artım deməkdir. Bu hesablamalar göstərir ki, əmək bazarında rentabelli qalmaq üçün bacarıqların transformasiyası və yenidən ixtisaslaşma mütləqdir".
