Çin dövlət informasiya agentliyi "Sinxua" Azərbaycanın Qax şəhərində ipəkçiliyin inkişafına həsr olunmuş material dərc edib.
“EDnews” xəbər verir ki, "Sinxua" Azərbaycanın 1 500 ildən çox tarixə malik Şərq ipək sənayesinin mərkəzlərindən biri olduğunu xüsusi qeyd edib.
Agentliyin məlumatına görə 1960-1970-ci illərdə barama istehsalı 20 min tonu keçirdi – ölkə SSRİ-də Özbəkistandan sonra ikinci yeri tuturdu.
"Keyfiyyətinə görə isə Azərbaycan ipəyi dünyada ən yaxşı ipək hesab olunurdu və Yaponiya, İsveçrə, İtaliyaya ixrac edilirdi. Lakin 1990-cı illərdə SSRİ-nin dağılmasından sonra təsərrüfat əlaqələri pozuldu, kolxozlar yox oldu, mütəxəssislər çıxıb getdi", - materialda vurğulanıb.
Agentlik qeyd edib ki, dönüş nöqtəsi 2016-cı ildə olub. Azərbaycan Prezidenti İlham Əliyev ipəkçiliyin inkişafına dövlət dəstəyi haqqında fərman imzalayıb.
"Yeni ipəkqurdu toxumlarının tətbiqi üzrə layihə başladı və ilk Çin tingləri və toxumları Tyan-Şan və Xəzəri keçərək Azərbaycana gəldi. Bu, "Bir kəmər və bir yol" təşəbbüsü çərçivəsində iki ölkənin əməkdaşlığında yeni bir fəsil olub", - məqalədə qeyd edilib.
Azərbaycan Çindən ipəkqurdu toxumlarını aktiv şəkildə almağa, onları inkubasiya etməyə və fermerlərə pulsuz paylamağa başladı ki, barama istehsalı ildə 6 min tona çatsın.
"2018-ci ildə Çin və Azərbaycan arasında ipəkçilik sahəsində əməkdaşlıq yeni səviyyəyə yüksəldi. Çinin texniki dəstəyi ilə Qax Damazlıq İpəkçilik Stansiyası yenidən qurulub. Prezident İlham Əliyev xanımı ilə birlikdə açılış mərasimində iştirak edərək, layihənin əhəmiyyətini vurğuladı", - materialda qeyd olunub.
"Sinxua" öz məqaləsində, həmçinin Pekin və Bakı arasındakı dostluq sayəsində uzun illər sonra Azərbaycanda ipəkçiliyi yenidən dirçəldən fermerlərin gündəlik həyatından da bəhs edir.
