Özbəkistanın Əndican şəhərində Azərbaycan və Özbəkistan universitetlərinin rektorları arasında ali təhsil sahəsində əməkdaşlığın gücləndirilməsi məqsədilə ilk görüş baş tutub. Bu barədə Özbəkistanın Ali Təhsil, Elm və İnnovasiyalar Nazirliyi məlumat yayıb.

“EDnews” xəbər verir ki, görüş zamanı tərəflər tələbə və alimlərin mübadiləsi, birgə təhsil proqramlarının və elmi tədqiqatların təşkili, həmçinin mütəxəssislərin hazırlanmasının keyfiyyətinin artırılması məsələlərini müzakirə ediblər. Akademik mobilliyin inkişafı üçün beynəlxalq seminarlar və təcrübə proqramlarının təşkili barədə də razılıq əldə olunub.

Tədbirdə Azərbaycan Respublikasının elm və təhsil nazirinin müavini İdris İsayev və Özbəkistanın ali təhsil, elm və innovasiyalar nazirinin müavini Şoxrux Daliyev iştirak ediblər. Rəsmi şəxslər uzunmüddətli və qarşılıqlı faydalı əməkdaşlığın vacibliyini vurğulayıblar və bu istiqamətdə birgə fəaliyyətə hazır olduqlarını bildiriblər.

Görüşün nəticəsi olaraq, iki ölkənin ali təhsil müəssisələri arasında akademik mübadilə, birgə tədqiqat layihələrinin hazırlanması və digər sahələri əhatə edən təxminən 60 sənəd – əməkdaşlıq sazişləri və niyyət protokolları imzalanıb. Nazirliyin məlumatında qeyd olunub ki, bu sənədlər elm və təhsil sahəsində yeni əməkdaşlıq mərhələsinin əsasını qoyur.

Fatimə Şükürova // EDnews