"Gürcüstanda "Qafqaz evi" qurula və ev sahibliyi edə bilər"-Açıqlama
Azərbaycan-Gürcüstan arasında əsrlər boyu qardaşlıq münasibətləri mövcuddur. Dövlətlərarası münasibətlər yüksək səviyyədə inkişaf etməkdədir. Zaman-zaman iki ölkə arasında birgə bir çox önəmli layihələr icra edilib və hər biri ölkə, xalq, coğrafi şərait üçün mühüm əhəmiyyət kəsb edir. Belə bir qarşılıqlı münasibətlər günümüzdə də davam etməkdədir. Yaxın günlərdə Gürcüstan Prezidenti Mixail Kavelaşvilinin ilk rəsmi səfərini Bakıya etməsi də söylənilənlərə bariz nümunədir. Bununla yanaşı, aprelin 17-si Tbilisidə Azərbaycan, Gürcüstan, Ermənistan XİN rəsmilərinin görüşü də sözügedən ölkələr və Qafqaz üçün gözlənilənlər barəsində mühüm məqamları açıqlayır. Lakin gizli qalan məqamlar da mövcuddur.
Bu zaman sual yaranır:
Sözügedən üçtərəfli görüş nələri vəd edir?
Mövzu ilə bağlı EDnews-a açıqlama verən politoloq Azad Məsiyev qeyd edib ki, Cənubi Qafqaz böyük güclərin maraqlarının toqquşduğu bir ərazidir:
"Başda ABŞ olmaqla Qərb koalisiyası ilə Rusiyanın maraqları kəsişir. Qərb, Cənubi Qafqaz Respublikalarından Rusiyaya qarşı istifadə etməyə çalışır. Şərqlə Qərbi birləşdirən Cənubi Qafqazın üç ölkəsində müəyyən fikir ayrılıqları mövcuddur. Bu ölkələrdən Azərbaycan beynəlxalq hüquq çərçivəsində qonşularla dinc, bərabər yaşamaq prinsipinə əməl etməkdədir. Gürcüstanla münasibətlərimizə gəlincə isə istər siyasi, istərsə də iqtisadi sahədə əlaqələrimiz yüksək səviyyədə olub, maraqlarımız uzlaşmaqdadır. Lakin Ermənistanın Azərbaycan ilə sülh sazişinə getməməsi, müəyyən maneələr yaratması münasibətlərdə stabilliyin pozulmasına gətirib çıxarır. Bu baxımdan da Qərb məhz Ermənistan üzərindən ölkəmizə təzyiq göstərməyə çalışır. Əgər Cənubi Qafqazda stabilliyin yaranmasını istəyiriksə, sözügedən üç ölkə arasında əməkdaşlıq vacib amillərdəndir. Bu ölkələrin ortaq məxrəcə gələ bilməsi üçün isə Ermənistan-Azərbaycan arasında sülh sazişi vacibdir".
Politoloq əlavə edib ki, yaxın günlərdə üç ölkənin xarici işlər nümayəndələrinin bir araya gəlməsi, habelə Gürcüstan Prezidenti Mixail Kavelaşvilinin Azərbaycana rəsmi səfəri siyasi-iqtisadi əməkdaşlığın inkişafının nəticəsidir. Baş verənlərin fonunda, Gürcüstanda "Qafqaz evi" qurula və ev sahibliyi edə bilər. Eləcə də gələcək zaman perspektivində Ermənistan-Azərbaycan arasında sülh sazişinin əldə olunmasının bu ölkə şəraitində baş tutması gözləniləndir. Gürcüstanın neytral və Cənubi Qafqazın maraq dairəsində olması məhz hadisələrin bu şəkildə inkişafı üçün zəmindir.
Aytac Əhmədova//EDnews
