Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən rəqabət qanunvericiliyinin pozulması ilə bağlı araşdırmalar aparılıb.
“EDnews” xəbər verir ki, bu araşdırmalar ölkə üzrə müxtəlif sahələrdə – ərzaq sənayesi, ticarət, sığorta və tikinti sektorlarında fəaliyyət göstərən hüquqi və fiziki şəxsləri əhatə edib. Bəzi hallarda araşdırmalar vətəndaş müraciətləri və bazar subyektlərinin şikayətləri əsasında, bəzi hallarda isə rəqabət orqanının öz təşəbbüsü ilə başlanıb.
“ABC-Telecom” MMC-nin “HOFFMANN” adlı yağla işləyən elektrik qızdırıcılarının satışı zamanı rəqabət qaydalarının pozulması ehtimalı nəzərə alınaraq Agentlik tərəfindən Rəqabət Komissiyasının yaradılması və pozuntu faktı üzrə işin başlanması barədə qərar qəbul edilib. Eynilə “Baku Electronics” MMC-nin “YOSHIRO” markalı televizorların satışı zamanı haqsız rəqabətə yol verdiyi müəyyən olunub və bu iş üzrə də hüquqi prosedurlar aktiv mərhələyə keçib.
Bəzi araşdırmalar nəticəsində qanun pozuntusu halları təsdiqini tapmayıb. Məsələn, “The Procter & Gamble Company” tərəfindən “İnci Group of Companies” QSC-yə qarşı əmtəə nişanlarından istifadəyə dair irəli sürülən iddia üzrə araşdırma başa çatıb və pozuntu halı qeydə alınmadığı üçün işə xitam verilib. Oxşar nəticə Şirvan Kommersiya Məhkəməsinin təqdimatı ilə “Azerbaijan Coca-Cola Bottlers” MMC-yə qarşı aparılan araşdırmada da qeydə alınıb. Alqı-satqı müqavilələrində rəqabət pozuntusu aşkarlanmayıb.
Diqqətçəkən hallardan biri “Trendyol Azərbaycan” MMC və “Bahar Store” MMC arasında olub. Burada məsələ qanunsuz reklam və haqsız rəqabət iddiası üzərində qurulub. Lakin araşdırma yekunlaşmadan əvvəl tərəflər pozuntunu könüllü şəkildə aradan qaldırıb və iş Agentlik tərəfindən xitamla bağlanıb.
Kompleks və çoxsaylı araşdırma tələb edən işlərindən biri “İvanovka Süd Məhsulları” MMC-nin təqdim etdiyi şikayətlər zənciridir. Şirkət müxtəlif fiziki və hüquqi şəxsləri - o cümlədən “ATENA” MMC, “Adilbərəkət” MMC, “Master Milk” MMC və bir neçə fərdi sahibkarı haqsız rəqabətdə ittiham edib. Bu müraciətlər əsasən süd və süd məhsullarının bazarında brend istifadəsi, məhsul dizaynı, qablaşdırma oxşarlığı və istehlakçının çaşdırılması halları ilə bağlıdır. Hazırda bu iddialar üzrə araşdırmalar davam edir.
Əmtəə nişanı ilə bağlı davam edən araşdırmalar arasında “Referans Medical Group” MMC-nin “Referans Media” MMC-yə qarşı “Referans” adından istifadəyə dair iddiası, “Qoç Ət” brendi ilə bağlı bir fiziki şəxsə qarşı araşdırma, “ZAGAR BAKU”, “Sherlock’s”, “SPERAK” və “MADİNA” nişanları ilə əlaqəli bir sıra hüquqi və fiziki şəxslərlə bağlı işlər də yer alır.
Tikinti materialları sektorunda da rəqabət mühitində gərginlik müşahidə olunub. “NORM” ASC tərəfindən “Qarant Beton-1” MMC-yə qarşı haqsız rəqabət iddiası ilə bağlı başladılan araşdırma da bu sahədə aparılan önəmli proseslərdəndir.
Agentlik bildirir ki, araşdırmaların əsas məqsədi ölkədə sağlam rəqabət mühitinin qorunması, istehlakçıların maraqlarının müdafiəsi və qanunsuz bazar davranışlarının qarşısının alınmasıdır.
