Minskdəki Dostluq Evində Belarusun alman-faşist işğalçılarından azad olunması zamanı xüsusi şücaət və qəhrəmanlıq göstərmiş azərbaycanlı qəhrəmanlara həsr olunmuş anım tədbiri keçirilib.
“EDnews” xəbər verir ki ,tədbir Azərbaycan Respublikasının Belarus Respublikasındakı səfirliyi və Belarusun Xarici Ölkələrlə Dostluq və Mədəni Əlaqələr Cəmiyyəti tərəfindən təşkil olunub. İkinci Dünya müharibəsində Qələbənin 80 illiyi çərçivəsində keçirilən tədbirdə Belarus Milli Elmlər Akademiyasının nümayəndələri, Azərbaycanın Belarusdakı səfirliyinin əməkdaşları, Belarus Respublikasının Azərbaycan icmaları konqresinin və Belarus Dostluq Cəmiyyətinin fəalları, eləcə də universitet və kollec müəllimləri və tələbələri iştirak ediblər.
Tədbirdə çıxış edən Azərbaycanın Belarusdakı səfiri Məhərrəm Əliyev Azərbaycan xalqının İkinci Dünya müharibəsində qələbəyə verdiyi mühüm töhfədən bəhs edib. O xatırladıb ki, Azərbaycandan cəbhəyə təxminən 700 minə yaxın insan yollanıb, onlardan 350 mindən çoxu geri qayıtmayıb. Müharibə dövründə göstərdikləri qəhrəmanlıq və şücaətə görə, 128 azərbaycanlı Sovet İttifaqı Qəhrəmanı adına layiq görülüb, onlardan 12-si Belarusun azad olunması uğrunda döyüşlərdə fərqlənib. 15 azərbaycanlı “Şöhrət” ordeninin bütün dərəcələri ilə təltif olunub. 170 mindən çox əsgər və zabitimiz müxtəlif orden və medallarla təltif olunub.
Diplomat İkinci Dünya müharibəsində qəhrəmancasına vuruşmuş azərbaycanlıların xatirəsinin daim diqqətdə saxlanılmasına görə Belarus rəhbərliyinə minnətdarlığını ifadə edib.
Belarus Dostluq Cəmiyyətinin Rəyasət Heyətinin sədri Nina İvanova çıxışında belə tədbirlərin xalqlar arasında qarşılıqlı anlaşma və hörmətin güclənməsinə töhfə verdiyini bildirib.
Tədbir çərçivəsində Əhməd Cavadın “Oyan” şeiri belarus dilində səsləndirilib, belarus və rus şairlərinin əsərləri ifa olunub.
Fatimə Mərdanlı // EDnews
