İsrail və Azərbaycan təhlükəsizlik və innovasiyalar, enerji, ticarət və turizm sahələrində sıx əməkdaşlıq qurub.

“EDnews” xəbər verir ki, bunu İsrail Prezidenti İsxak Hersoq Azərbaycanın Müstəqillik Günü münasibətilə təbrik videomüraciətində bildirib.

"İsrail xalqı və dövləti adından ən səmimi təbriklərimi qəbul edin", - İ.Hersoq qeyd edib.

O, Azərbaycan və İsrail xalqlarının dərin əməkdaşlıq tarixinə malik olduğunu vurğulayıb. Prezident, həmçinin müxtəlif mədəniyyətlərə və dinlərə mənsub xalqların Azərbaycanda sülh şəraitində yaşamasına imkan verən Azərbaycan multikulturalizmini xatırladıb.

"Yəhudi və Azərbaycan xalqları arasındakı əlaqələr əsrlər və minilliklər boyu davam edir. Bu qədər uzun müddət ərzində Azərbaycan tolerantlıq, müxtəliflik, bərabərlik rəmzi və müxtəlif mədəniyyətlərdən olan insanlar və xalqlar arasında birgəyaşayış, hörmət və əməkdaşlığın mümkünlüyünün sübutudur", - Hersoq bildirib.

O, həmçinin Azərbaycan Prezidenti İlham Əliyevin İsraillə dövlətlərarası əlaqələrin möhkəmləndirilməsində mühüm rolunu qeyd edib.

"Biz Prezident Əliyevin öz ölkəsində təmin etdiyi əhəmiyyətli inkişafı şəxsən müşahidə etmək və əməkdaşlığımızın daha da inkişafı və genişləndirilməsi imkanlarını birlikdə müzakirə etmək şərəfinə nail olduq. Əziz dostum Prezident İlham Əliyevi təbrik edir, Azərbaycanın gələcək inkişafına və iki xalqımız arasında əlaqələrin möhkəmlənməsinə qəti əminliyimi ifadə etmək istəyirəm", - Hersoq vurğulayıb.

Onun sözlərinə görə, Azərbaycan bu gün regional və diplomatik dialoq üçün mühüm qovşağa çevrilib.

İsrail Prezidenti həmçinin bu yaxınlarda keçirilmiş "Eurovision" mahnı müsabiqəsində İsrailə göstərdiyi dəstəyə görə Azərbaycana təşəkkür edib: "Eurovision"da Azərbaycan xalqı və münsiflər heyəti tərəfindən göstərilən dəstək son dərəcə təsirli jest idi".