Azərbaycanın ədliyyə naziri Fərid Əhmədov Özbəkistana səfəri çərçivəsində Pakistanın hüquq və ədliyyə naziri Əzəm Nazir Tarar ilə görüşüb.

EDnews xəbər verir ki, görüş zamanı iki ölkə arasında siyasi, iqtisadi, hüquqi və ticarət sahələrində uğurlu əməkdaşlıqdan bəhs olunub və münasibətlərin strateji tərəfdaşlıq səviyyəsinə yüksəldiyi vurğulanıb.

Nazir Fərid Əhmədov Pakistanın Baş naziri Məhəmməd Şehbaz Şərifin bu yaxınlarda Azərbaycana etdiyi rəsmi səfəri, həmçinin onun işğaldan azad edilmiş Laçında keçirilən ikinci Azərbaycan-Türkiyə-Pakistan Zirvə Görüşündə iştirakını iki xalq arasında möhkəm dostluq və qardaşlığın bariz nümunəsi kimi dəyərləndirib.

Eyni zamanda, ötən il imzalanmış Əməkdaşlıq Memorandumunun hüquqi sahədə qarşılıqlı fəaliyyət üçün yeni imkanlar yaratdığı diqqətə çatdırılıb.

Görüşdə ədliyyə sahəsində gələcək əməkdaşlıq perspektivləri, həmçinin qarşılıqlı maraq doğuran digər mövzularda fikir mübadiləsi aparılıb.

Əzəm Nazir Tarar isə münasibətləri daha da möhkəmləndirmək məqsədilə yaxın aylarda Azərbaycana rəsmi səfər etməyi planlaşdırdığını bildirib.

Fatimə Şükürova // EDnews