İqtisadiyyat Nazirliyi yanında Dövlət Vergi Xidməti özəl tibbi praktika ilə məşğul olan fiziki şəxslər tərəfindən göstərilən xidmətlərlə bağlı vergi qanunvericiliyinə dəyişiklik edilib.
Dövlət Vergi Xidmətinin mətbuat katibi Şahin Məmmədov Ednews-a açıqlamasında bildirib ki, dəyişiklik tibb fəaliyyəti sahəsində vergidən yayınmanın miqyasının azaldılması, gəlirlərin leqallaşdırılması məqsədi daşıyır:
“Qanuna əsasən, tibbi fəaliyyəti 2 formada - özəl tibb müəssisələri və özəl tibbi praktika ilə məşğul olan fiziki şəxslər tərəfindən həyata keçirilir. Özəl tibbi praktika ilə məşğul olan şəxslərin müvafiq sahədə ali və ya orta tibb təhsili olmalıdır. Bu vaxta qədər fiziki şəxslər hüquqi şəxs yaratmadan xüsusi razılıq əsasında fəaliyyət göstərirdilər. Tibb müəssisələri tərəfindən göstərilən tibbi xidmətlər üzrə pul hesablaşmaları qaydaları onlara şamil edilmirdi”.
Şahin Məmmədov qeyd edib ki, son dəyişikliklərlə fiziki şəxslər tərəfindən göstərilən tibbi xidmətlər üzrə də pul hesablaşmaları nəzarət-kassa aparatları vasitəsilə həyata keçiriləcək:
“Ödəniş çekləri əsasında ƏDV-nin bir hissəsi istehlakçılara geri qaytarılacaq. Tibbi xidmətlərin müqabilində müəyyən olunmuş limitdən artıq nağd qaydada ödəniş qəbul edən özəl tibbi praktika ilə məşğul olan fiziki şəxslər cərimələnəcək”.