Ermənistan Baş naziri Nikol Paşinyan noyabrda Bakıda keçiriləcək COP29-a qədər sülh müqaviləsinin imzalana biləcəyini açıqladı. Hətta hər an imzalanmağa hazır olduğunu söylədi. Müqavilə imzalanmaq üçün hazırdırmı, yəni Paşinyanın pozitivliyi üçün bir əsas varmı? Saziş noyabra qədər imzalansa, Paşinyan COP29-da iştirak üçün Bakıya dəvət edilə bilərmi, edilsə, gələrmi? Bu məsələ Milli Məclisdə də gündəmə gətirilmişdi.

Mövzu ilə bağlı Ednews-a politoloq Elşən Manafov münasibət bildirib. 

"Paşinyanın açıqlamasından belə məlum olur ki, Brüsel, Praqa və Soçidə keçirilmiş görüşlərdə imzalana biləcək sülh müqaviləsinin baza prinsipləri müəyyənləşdirilib. Halbuki bu günlərdə Alma Atada keçirilmiş görüşdə tərəflərin çərçivə sazişinin mətni ətrafında bəzi məsələlərə münasibətdə fərqli baxışlarının olduğu bəlli oldu. Bu isə, sülh sazişinin mətninə sadəcə hansısısa detalların köçürülməsi ilə bağlı Paşinyanın bəyənatında qeyri-müəyyənliyin olmasını düşünməyə əsas verir. Hər halda rəsmi Bakının bununla əlaqədar bəyənatlarında Paşinyan qədər optimistlik özünü biruzə vermir. Halbuki Ermənistan iqtidarından fərqli olaraq rəsmi Bakı Qərbin güclü presinqi altında deyil. Rusiya ilə münasibətlərimiz isə Ermənistandan fərqli olaraq qarşılıqlı etimad müstəvisi üzərindədir".

Politoloq qeyd edir ki, erməni iqtidarı Azərbaycan prezidentinin problemin hüquqi zəmində həlli məqsədilə irəli sürdüyü 5 məlum prinsipdən 3-nə münasibətdə mövqe sərgiləyib:

"Qalan məsələlərə rəsmi İrəvanın mövqeyində qeyri-müəyyənlik qalır. Sülh sazişinin imzalanması proseslərinə delimitasiya və demarkasiya ətrafında gedən müzakirələr dinamizm verə, sürətləndirə bilər. Demarkasiya ətrafında danışıqlarda hələlik əyləc mexanizmləri rolunda çıxış edən amillər isə, Ermənistandakı etiraz aksiyaları və region ətrafında geosiyasi vəziyyətin mürəkkəbliyidir".

Oğuz