Ermənistanın keçmiş prezidenti Serj Sarkisyan Nikol Paşinyanın üçüncü müddətə seçilməsi ilə bağlı fikirlərinin təhrif edildiyini və manipulyasiya olunduğunu bildirib.
EDnews xəbər verir ki, Sarkisyan bu barədə jurnalistlərlə söhbətində danışıb.
Ona Nikol Paşinyanın vaxtilə Sarkisyanı üçüncü müddətə seçilməsinə görə tənqid etdiyi, lakin sonradan özünün də oxşar addım atdığı barədə sual ünvanlanıb. Sarkisyan cavabında bildirib ki, nə o, nə də Paşinyan üçüncü müddətə yenidən seçilməyib.
Keçmiş prezidentin sözlərinə görə, o, iki dəfə prezident olub, daha sonra isə baş nazir seçilib. Paşinyanın vəziyyətində isə əvvəlki iki səsvermə növbədənkənar seçkilər formatında keçirilib.
Sarkisyan qeyd edib ki, Paşinyanın üçüncü müddətə seçilməsi ilə bağlı məsələ Ermənistan Konstitusiyasına mümkün dəyişikliklər kontekstində qaldırılıb və onun cavabı da məhz bu məntiqdən irəli gəlib.
“İnsanlar mənim sözlərimi manipulyasiya edirlərsə və ya konteksti başa düşmürlərsə, onlar axmaqdırlar. Çünki yalnız axmaqlar düşünə bilər ki, mən Ermənistanı şüurlu şəkildə kapitulyasiyaya aparan, kilsəyə hücum edən bir şəxsi haqlı çıxara bilərəm. İndi nə alınır? Bütün bunlar ‘heç nədir’, o isə yalnız üçüncü müddətə getdiyinə görə günahkardır? Aydındır ki, onlarda heç nə alınmayacaq. Mənim dediklərim tamamilə aydındır”, — deyə Sarkisyan bildirib.
Aysel Hacıyeva | EDnews
.jpg)
