"SpaceX" şirkətinin Starship kosmik gəmisi səkkizinci sınaq uçuşu zamanı idarəetmədən çıxıb. Uçuşun səkkizinci dəqiqəsində bir neçə "Raptor" mühərriki sıradan çıxıb, gəmi spiral formasında fırlanmağa başlayıb və Atlantik okeanı üzərində partlayıb.  

“EDnews” xəbər verir ki, komanda "Starship"-i superağır daşıyıcı raketin köməyi ilə buraxıb və ilk səkkiz dəqiqə ərzində hər şey problemsiz gedib.

Gəmi uğurla ayrılıb və kosmosa istiqamətlənib, daşıyıcı raket isə Texasdakı start meydançasına geri dönüb və start qülləsi tərəfindən üçüncü dəfə uğurla tutulub.  

Uçuş zamanı "Starship"-in orbitə dörd ədəd "Starlink" peyk maketi yerləşdirməsi planlaşdırılırdı. Lakin səkkizinci dəqiqənin doqquzuncu saniyəsində "SpaceX"-in canlı yayımı dörd "Raptor" mühərrikinin sıradan çıxdığını göstərib və bundan sonra gəmi nəzarətdən çıxaraq fırlanmağa başlayıb.  

ABŞ-ın Federal Mülki Aviasiya Administrasiyası (FAA) "kosmik buraxılış qalıqları” ilə bağlı narahatlığa görə Floridadakı əsas hava limanlarında uçuşları müvəqqəti dayandırıb.  

Gəminin qalıqları Baham adaları və Dominikan Respublikası üzərində müşahidə edilib. "SpaceX" bildirib ki, təhlükəsizliyə cavabdeh rəsmi şəxslərlə əvvəlcədən planlaşdırılmış fövqəladə tədbirlərin həyata keçirilməsi üçün dərhal koordinasiyaya başlayıb.  

Bu, ardıcıl ikinci uğursuz sınaq buraxılışıdır. Araşdırmalardan sonra "SpaceX" müəyyən edib ki, "Starship"-in daxilində yanacaq sızması baş verib, bu da yanğına və gəmi ilə rabitənin itməsinə səbəb olub, nəticədə gəmi partlayıb.  

Səkkizinci sınaqdan əvvəl "SpaceX" yanacaq xətlərini təkmilləşdirdiyini, yanacağın temperaturunu dəyişdiyini, əlavə havalandırma dəlikləri və "yeni təmizləmə sistemi” quraşdırdığını açıqlamışdı. Bu tədbirlər yanacaq sızması riskini minimuma endirmək üçün nəzərdə tutulmuşdu.