Nazirlər Kabinetinin qərarına əsasən, 2023-2024-cü tədris ilində ölkənin hər bir ümumi təhsil müəssisəsi üzrə vahid məktəbli geyimi tətbiq ediləcək. Həmin qərarda məktəblər tərəfindən 4 cür geyim formasından birinin seçilməsi nəzərdə tutulur.
Tədris ilinin başlamasına sayılı günlərin qaldığını nəzərə alsaq, bu qədər məktəbli formasının hazır olması üçün zamanın yetərli olub-olmaması müzakirə edilir.
Məsələ ilə bağlı Ednews –a danışan "Bakı Tikiş Evi" ASC-nin satış şöbəsinin müdiri Etibar Əzimov bəzi məsələlərə aydınlıq gətirib. O, qeyd edib ki, hazırlıq işləri cari ilin qış aylarından start götürüb.
“2022-2023 tədris ilində yalnız aşağı siniflər (I-VI) üçün formalar hazırlanıb. Artıq yeni tədris ili üçün yuxarı siniflərdə yeni məktəbli formalarından istifadə edə biləcək. Qış aylarından vahid məktəbli formasının tikişinə başlanılıb. Böyük əksəriyyət formaları artıq hazırlanıb”.
O, həmçinin geyimlərin qiymətlərin də açıqlayıb.
“Yeni tədris ilində məktəblər hansı rəngi seçibsə, üç il müddətində o qüvvədə qalacaq. Yeni məktəbli formalarında bütün ölçülərdə uzunqol və qısaqol köynəklərin qiyməti 15, şalvar və ətək isə 25 manata olacaq. Parçalar Türkiyə və Belarusiyadan gətirilib”.
Qeyd edək ki,, keçən il yeni məktəbli formalarında bütün ölçülərdə uzunqol və qısaqol köynəklərin qiyməti 14, şalvar və ətək isə 25 manata alıcılara təqdim olunurdu.
Xatırladaq ki, ölkə üzrə 1 milyon 400 minə yaxın şagird var.
Aynurə İsmayıl
