13 may 2025-ci il tarixində Beynəlxalq Avrasiya Mətbuat Fondunun (BAMF) Himayəçilik Şurasının növbəti – bu il ərzində sayca ikinci iclası keçirilib. İclasda BAMF-ın 2025-2030-cu illər üzrə hazırlanan strateji planından, Milli Mətbuatın 150 illik yubileyi ilə bağlı görüləcək işlərdən, o cümlədən, Himayəçilik şurasının üzvü Vaqif Bəhmənlinin 70 illik yubileyi münasibətilə keçiriləcək tədbirlərdən və ilin geridə qalan hissəsində əldə olunan nəticələrdən danışılıb. 

İlk öncə BAMF-ın uzunmüddətli strateji planının əsas məqamlarını qeyd edən fondun prezidenti Umud Mirzəyev qarşıya qoyulan hədəfləri şura üzvlərinin diqqətinə çatdırıb. İclasda iştirak edənlər - BAMF-ın Himayəçilik Şurasının sədri, Xalq yazıçısı Çingiz Abdullayev, üzvlər Rəşad Məcid, Əflatun Amaşov, Vaqif Bəhmənli və BAMF prezidentinin müşaviri Musa Mərcanlı növbəti 5 illik planla bağlı fikirlərini bölüşüblər. 

Ardınca Milli Mətbuatın 150 illik yubiley tədbirləri ilə bağlı ətraflı müzakirələr aparılıb. Nəticədə Azərbaycan Mətbuat Şurası ilə BAMF-ın birgə mümkün tədbirlər planının hazırlanmasına qərar verilib. Qərara əsasən təklif hazırlandıqdan sonra Mətbuat Şurasına rəsmi müraciət ediləcək. İclasda, həmçinin, şura üzvü Vaqif Bəhmənlinin də 70 illik yubileyi münasibətilə görüləcək işlər müzakirəyə çıxarılıb.

Yekunda ilin ilk 4 ayında əldə olunan nəticələr, görülən işlər və növbəti mərhələlər üçün planlanan hədəflər dinlənilib.