Bu günlərdə hava şəraiti ilə əlaqədar ictimai nəqliyyatda çətinliklər yaşanır.

Ednews xəbər verir ki, müntəzəm marşrut xətlərinin bəzilərinin qrafikində ciddi ləngimə müşahidə olunur.
Saytımıza 18 saylı müntəzəm marşrut xətti üzrə şikayət daxil olub.

Turan Həsənli bildirib ki, son zamanlar 18 saylı marşrutun qrafiki ciddi narahatlıq yaradır: "Təkcə bu gün yox, ümumiyyətlə, son 1 ay ərzində ləngimə çox olur. Mən İçəri Şəhər metrosuna yaxın dayanacaqda gözləyirəm. Əvvəllər 10, uzağı 15 dəqiqədən bir gəlirdi avtobus. Axır vaxtlar bəzən yarım saata qədər gözləməli oluram. Yolum Milli Məclis (Səbayıl rayonu- red.) olduğu üçün alternativ marşrutlar da gecikmə halları müşahidə edilir. Bu gün ən azı 30 dəqiqə dayanacaqda dayanmışam. "Qaynar xətt"ə də şikayət etmişəm. Belə olmaz. Onsuz da yolda tıxac olur, evdən 15 dəqiqə tez çıxdım ki, işə vaxtında çatım, amma yenə də gecikdim. İlk dayanacaqda 3-4 avtobus dayanır, biz isə dayanacaqda gözümüz yollarda qalır".

Azərbaycan Yerüstü Nəqliyyat Agentliyinin (AYNA) mətbuat katibi Tural Orucov Ednews-un sorğusuna cavabda bildirib ki, məsələ qısa zamanda araşdırılacaq. 

Bakı Nəqliyyat Agentliyinin Mətbuat xidmətinin rəhbəri Mayis Ağayev ilə dəfələrlə əlaqə yaratmağa çalışsaq da buna nail ola bilmədik.

Məsələnin ciddiyətini nəzərə alaraq araşdırmalarımıza davam edəcəyik.

Oğuz