Son zamanlar ölkədə ailə-məişət zəminində baş verən hadisələrin, cinayətlərin sayı nəzərəçarpacaq dərəcədə artıb. Ailə münaqişəsi zəmnində törədilən cinayətlərin sayı niyə artıb, səbəblər nədir?
Ednews-a danışan psixoloq Gülnar Orucovanın sözlərinə görə, son dönəmlərdə ailələrdə həm münaqişələrin sayı, həm ölüm halları artıb. Psixoloq bildirir ki, ümumiyyətlə, insanın içindəki kin, nifrət, aqressiya bu vəziyyəti gətirib çıxarır:
“Aqressiya insanda yaranıbsa müxtəlif cür təzahür edə bilir. Kimi aqressiv olur, qışqırır, hirslənir, kobud sözlərdən istifadə edir. Kimi də aqressiv olub qarşı tərəfi öldürür. Çalışmalıyıq ki, hisslərimizi idarə edə bilək. Bugün Azərbaycanda kifayət qədər özümüzü idarə etmək, inkişaf etdirmək üçün psixoloqlar, həkimlər, istərsə də digər şəxslər seminarlar təşkil edir. Amma biz bu seminarlara getmək əvəzinə boş vaxtlarımızı kompüter, telefon arxasında keçiririk. Baxırıq ki, başqaları müəyyən həyatlar yaşayır, ağlımıza niyə bizim yoxdur, deyə fikirlər gəlir. "Mən nə edirəm alınmır" o sualı özümüzə vermirik. Bəzən ailələr də münaqişələr topaq, ev, mal-mülk, pul üstündə yaranır. Ona görə çalışmalıyıq ki, özümüzü inkişaf etdirək, özümüz qazanaq, heç kimin malında, mülkündə gözümüz olmasın”.
Psixoloq onu da vurğuladı ki, öz işlərimiz o qədər yaxşı, uğurlu olmalıdır ki, bizə başqalarnın həyatı, varlığı, malı-mülkü, sərvəti maraqlı olmasın. Aktiv həyat tərzi sürməliyik. İdmanla məşğul olmalı, istirahətimizi düzgün təşkil etməliyik. Amma biz nə edirik?
“Telefon arxasında ancaq onun, bunun arxasınca danışmaq, qiybət etmək, kimsə nəyəsə sahib olubsa o insanı haram qazanmaqda, düzgün həyat yaşamamaqda ittiham edirik. Bu gün ailələrdə münaqişələrin səbəbi həm də erkən nikah, istəmədiyi adamla ailə qurmaq da ola bilir. Boşanmaq istəyib, boşana bilməmək, qaynana gəlin problemləri də münaqişəyə səbəb olur. Xüsusilə də cinayətlərin əsasında aqessiya dayanır”.
Sosioloq Lalə Mehrəlinin fikrincə isə psixoloji dispanserlər də, müalicə mərkəzlərində qalmalı olan insanlar küçələrdə sərbəst gəzir.
“İnsanların pis vərdişləri var, bundan əvvəl törətdiyi yüngül də olsa cinayət tərkibli əməllərə yaxın çevrəsi etinadsız yanaşıb. Ümumiyyətlə, valideynlər övladında qeyri-normal davranış görəndə övladına yaraşdırmır. Başqaları bilər, başqaları qınaq edər deyə gizlətməyə çalışır. Biz bunu Əhməd hadisəsində də görmüşdük. Bilə-bilə ki, övladı normal deyil, onu müalicə mərkəzində saxlamaq yerinə azadlığa buraxmışdılar. Onun başqalarına zərər yetirmək ehtimalını etinasızlıqla qarşılamışlar. Nəticədə də bir ailə faciəsi yaşandı. Əgər övladımızda, yaxınımızda, tanıdığımızda hər hansı anormal vəziyyət görüb etinasızlıq ediriksə bu doğru deyil”.
Aynurə İsmayıl
