Bu gün “Sülhün Kökləri” təşkilatının təsisçisi və rəhbəri Heidi Kuhn Beynəlxalq Avrasiya Mətbuat Fondunun Prezidenti Umud Mirzəyevə məktub ünvanlayıb. ABŞ dövlət departamentinin 22 Yanvar tarixində imzaladığı bütün növ humanitar fəaliyyətlərə ayrılan vəsaitlərin 90 gün müddətində dayandırılması haqqında qərarının təşkilatın və həyata keçirdiyi layihələrinin fəaliyyətinə göstərdiyi neqativ təsirlərdən danışan H.Kühn xanım “Sülhün Kökləri”-nin Əfqanıstanda və Qarabağda həyata keçirdiyi layihələr və onların təsirləri haqqında BAMF Prezidentinə ətraflı məlumat verib və ondan bu məlumatların geniş auditoriyaya yayılmağı üçün yardım istəyib.

Müraciətə reaksiya verən BAMF Prezidenti Umud Mirzəyev məsələ haqqında bunları deyib:

“Burada söhbət hansısa dövlətin siyasətindən yox, bəşər övladının taleyindən gedir. Humanitar fəaliyyət dövlətlərə yox, insanlara yönəlməlidir. İnsanların həyatı hər növ siyasətdən üstün tutulmalıdır.

Hazırda “Sülhün Kökləri” və onun kimi yüzlərlə humanitar təşkilat dünyanın hər tərəfində müxtəlif sferalarda müxtəlif dövlətlərin müxtəlif siyasətlərinin nəticələrini aradan qaldırmaq üçün fədakarlıqla çalışırlar. Məsələn, “Sülhün Kökləri” təşkilatının Əfqanıstanda və Qarabağda həyata keçirdiyi layihələri zəruri edən şərtlərin formalaşmasında  dolayı yolla olsada, ABŞ adminstrasiyasının da rolu var.  Vətəndaş cəmiyyətinin yeganə siyasəti dünyanı daha yaşanabilən, təhlükəsiz, firavan vəziyyətə gətirməkdir".