Fövqəladə Hallar Nazirliyinin Nüvə və Radioloji Fəaliyyətin Tənzimlənməsi üzrə Dövlət Agentliyi ilə Sumqayıt Regional Mərkəzinin birgə təşəbbüsü ilə “Nüvə və radioloji fəaliyyətin tənzimlənməsi, təhlükəsizlik tədbirləri, insan sağlamlığının və ətraf mühitin qorunması” mövzusunda maarifləndirmə tədbiri baş tutub.

“EDnews”-un məlumatına əsasən, görüşdə Sumqayıt Şəhər və Abşeron Rayon İcra Hakimiyyətlərinin, həmçinin Regional Mərkəzin əhatə etdiyi digər rayonların kommunal xidmət nümayəndələri və Nazirliyin yerli qurumlarının əməkdaşları iştirak ediblər.

Çıxış edənlər — Agentliyin rəis müavini Xəzər Əmiraslanov və Sumqayıt Regional Mərkəzinin rəis müavini, polkovnik-leytenant Rafiq Həsənov — radiasiya təhlükəsizliyi istiqamətində həyata keçirilən tədbirlər barədə danışaraq bu cür maarifləndirmə tədbirlərinin önəmini vurğulayıblar.

Tədbirdə 40-dan çox nümayəndənin iştirakı ilə nüvə və radioloji fəaliyyətin nəzarət mexanizmləri, sahibsiz radioaktiv mənbələrlə bağlı davranış qaydaları, eləcə də qəza hallarında idarəetmə metodları müzakirə olunub.

Toplantı çərçivəsində Agentliyin mütəxəssisləri — Nüvə və radiasiya təhlükəsizliyinin ekspertizası şöbəsinin müdiri Mətanət Qəhrəmanova, nəzarət şöbəsinin müdiri İlham Sadıqov və qəzalar zamanı idarəetmə sektorunun rəhbəri Baba Babayev — müxtəlif təqdimatlarla çıxış ediblər. Həmçinin radiasiya qəzalarına dair hazırlanmış videoçarx nümayiş olunub.

Tədbir interaktiv şəkildə davam edib, iştirakçılardan gələn suallar cavablandırılıb.

Şəms Qasımlı // EDnews