Millət vəkili Fazil Mustafa bir neçə gün əvvəl Mütləq Döyüş Çempionatının (UFC) Bakıda təşkil olunan turnirinin əsas döyüşündə Azərbaycan təmsilçisi Rafael Fiziyevin döyüşə dini motivli musiqi ilə çıxmasını tənqid edib.
"Bu yaxınlarda qaydasız döyüş üzrə idman yarışı keçirilirdi, Azərbaycanı təmsil edən idmançı artıq "Uvertüra" və ya "Cəngi" sədaları altında yox, mərsiyə sədaları altında meydana çıxır. Qalib gələndən sonra da Azərbaycan bayrağı əvəzinə hansısa ölkələrdə populyar olan dini ideoloji şüarları səsləndirir. Biz də hamımız sakitcə bunu müşahidə edirik. Ona görə də biz qanunda məhz bu prinsipləri nəzərə almalıyıq".
Ağ Partiya sədri Tural Abbaslı bu barədə EDnews-a danışıb.
O hesab edir ki, protokol yoxdursa, idmançının hansı musiqi ilə meydana çıxması onun şəxsi seçimi və motivasiyasıdır:
Onun sözlərinə görə, peşəkar idmanda idmançılar döyüşə fərqli motivasiyalarla çıxırlar:
“Bəzisi təkbir gətirir, bəzisi fərqli musiqi seçir, digəri başqa simvol və ya motivdən istifadə edir. Bunlar idmançının psixoloji hazırlığının bir hissəsidir. Belə məsələləri siyasiləşdirmək düzgün deyil".
Tural Abbaslının qənaətincə, əgər bu, dövlətçiliyə, milli təhlükəsizliyə və milli-mənəvi dəyərlərə təhlükə yaratmırsa, hər məsələyə qarışmağa ehtiyac yoxdur. İdmançılara, incəsənət adamlarına və yaradıcı insanlara müəyyən sərbəstlik verilməlidir.
“Millət vəkilləri idmançının hansı musiqi ilə meydana çıxmasını müzakirə etməkdənsə, gənclərin idmana cəlb olunması, idman infrastrukturunun inkişafı, narkomaniya və digər zərərli vərdişlərin qarşısının alınması kimi məsələlərə diqqət yetirməlidirlər".
Onun sözlərinə görə, bölgələrdə idman imkanlarının artırılması daha vacib məsələdir:
“Gəlin baxaq, rayon və kəndlərdə neçə gənc idmanla məşğuldur, neçə gənc isə vaxtını çayxanalarda və ya sosial şəbəkələrdə keçirir? Müzakirə edilməli əsas mövzular bunlardır".
Partiya sədri dini inanclara hörmətlə yanaşılmasının vacibliyini də vurğulayıb:
“Siyasətin insanların imanına və dini seçimlərinə müdaxilə etməsi düzgün deyil. Əgər həmin davranış qanun pozuntusu yaratmırsa və dövlətçiliyə təhlükə yoxdursa, buna görə kimisə hədəfə çevirmək doğru yanaşma deyil".
Sonda o, Rafael Fiziyevin seçimini müdafiə edib:
“Yaxşı edib həmin musiqi ilə çıxıb. Öz zəhməti ilə bu səviyyəyə yüksəlib, Azərbaycan bayrağını ucaldır. Belə məsələləri süni şəkildə gündəmə gətirmək əvəzinə, idmanın inkişafı barədə danışmaq daha faydalıdır".
Xatırladaq ki, mütləq Döyüş Çempionatının (UFC) Bakıda təşkil olunan turnirinin əsas döyüşündə Azərbaycan təmsilçisi Rafael Fiziyev meksikalı Manuel Torreslə üz-üzə gəlib. Yüngül çəkidəki görüşdə R.Fiziyev rəqibinə qalib gəlib. Fiziyev döyüşə mərsiyə sədaları altında çıxıb.
