Yay transfer pəncərəsinə iddialı şəkildə hazırlaşan "Fənərbağça" növbəti mövsümdə UEFA Çempionlar Liqasında uğur qazanmaq məqsədilə heyətinə ən azı 4 super ulduz futbolçu cəlb etməyi planlaşdırır.

EDnews xəbər verir ki, İstanbul klubunun prioritet transfer hədəfi İngiltərə Premyer Liqasının son çempionu “Mançester Siti”nin ulduz futbolçusu Cek Qrilişdir.

Məlumata görə, "Fənərbağça"nın idman direktoru Mario Branco bu transferi reallaşdırmaq üçün birbaşa İngiltərəyə səfər etməyə hazırlaşır. O, həm "Siti" rəhbərliyi, həm də 28 yaşlı futbolçunun meneceri ilə görüşlər keçirmək niyyətindədir.

Cek Qriliş bu mövsüm "Mançester Siti"də gözlənilən performansı göstərə bilməyib və onun komandadan ayrılacağı ilə bağlı söz-söhbətlər səngimək bilmir. Bu isə “Fənərbağça” üçün böyük fürsət hesab olunur.

Maraqlıdır ki, portuqaliyalı baş məşqçi Joze Mourinyonun da klubun planlarına birbaşa təsir göstərdiyi və Qrilişin oyun üslubunu komandaya uyğun gördüyü bildirilir.

Əgər transfer baş tutarsa, bu, “Fənərbağça” tarixində ən səs-küylü keçidlərdən biri olacaq və Türkiyə Superliqasında ulduz futbolçuların sayı daha da artacaq.

Fatima Şükürova // EDnews