ABŞ-nin Ankaradakı səfirliyinə namizəd olan Tom Barrak Senatdan təsdiq alıb.
“EDnews” xəbər verir ki , ABŞ Senatında Barrakla bağlı səsvermə keçirilib. Səsvermə nəticəsində 36 səs "əleyhinə", 60 səs "lehinə" olmaqla, Tom Barrak ABŞ-nin Ankara səfiri vəzifəsinə təsdiq edilib.
Qeyd edək ki, aprelin əvvəlində Senatdakı təsdiqləmə dinləmələrində o, Türkiyə barədə fikirlərini ifadə etmişdi.
"Avropa, Asiya və Yaxın Şərqin ən strateji kəsişməsində yerləşən, dəyərli NATO tərəfdaşımız Türkiyənin alyansa verdiyi töhfələri saymaqla bitməz", - deyə Barrak o zaman bildirmişdi.
ABŞ-nin Kaliforniya ştatında doğulub böyüyən 77 yaşlı Tom Barrak Cənubi Kaliforniya Universitetində bakalavr təhsili alıb, San-Dieqo Universitetində isə hüquq fakültəsini bitirib.
1900-cü ildə Livanın Zahle şəhərindən ABŞ-yə köçən livanlı xristian mühacir ailənin nəvəsidir. Atası baqqal, anası isə katibə olub. Los-Ancelesin Kalver-Siti şəhərində böyüyüb.
Tələbəlik illərində reqbi komandasına qatılaraq idmanla məşğul olub. Həmçinin Səudiyyə Ərəbistanında hüquqşünas kimi fəaliyyət göstərib.
1980-ci illərdə Reyqan administrasiyasında daxili işlər naziri müşavirinin müavini vəzifəsində çalışıb. Kaliforniyanın Ranço-del-Sielo şəhərində 40-cı prezident Ronald Reyqanın qonşusu olub.
Fatimə Mərdanlı //EDnews
