Hindistanın Baş naziri Narendra Modi müdafiə nazirinin iştirakı ilə Nazirlər Kabinetinin siyasi məsələlər üzrə komitəsinin təcili iclasını çağırıb.

  “EDnews”“The Economic Times” nəşrinə istinadla xəbər verir ki, komitə Hindistanın iqtisadi və siyasi strategiyalarında həlledici rol oynayır və onun çağırılması vəziyyətin ciddiliyini göstərir.

İclas Pakistanın informasiya naziri Attaullah Tararın Hindistanın yaxın 24-36 saat ərzində ölkəsinə zərbələr endirməyi planlaşdırdığına dair etibarlı kəşfiyyat məlumatlarına malik olduqlarını deməsi fonunda baş tutacaq.

Attaullah Tarar, həmçinin Dehlini Pahalqam hücumunda Pakistanın əli olduğuna dair əsassız və uydurma iddialar irəli sürməkdə ittiham edib.

Qeyd edək ki, regionda vəziyyət Cammu və Kəşmir bölgəsinin Pahalqam şəhəri yaxınlığında 26 nəfərin ölümü ilə nəticələnən terror hücumundan sonra gərginləşib. Hücuma görə məsuliyyəti “Ləşkər-e-Taiba” təşkilatı ilə bağlılığı olan “Müqavimət Cəbhəsi” qruplaşması üzərinə götürüb. Dehli hücumda iştirak edən şəxslərin arasında üç pakistanlının və 2018-ci ildə həmin ölkəyə gedən Cammu və Kəşmirdən olan iki nəfərin olduğunu deyir.

Pakistan Senatı İslamabadın hücumda hər hansı rolunu rədd edən qətnamə qəbul edib.

Hadisədən sonra tərəflər bir-birinə qarşı bəzi tədbirlər görüb ki, bu da iki ölkə arasında gərginliyin artmasına səbəb olub.

Fatimə Mərdanlı //EDnews