Azərbaycan Respublikasının Mərkəzi Bankı tərəfindən müasir, innovativ ödəniş həlli kimi istifadəçilərə təqdim olunan “AniPay” mobil tətbiqində yeni istifadəçilərin qeydiyyatı artıq bir neçə aydır ki, dayandırılıb. Mobil tətbiqin dayandırılmasına səbəb olaraq, keyfiyyətin artırılması ilə bağlı texniki işlərin görülməsidir.
“EDnews” xəbər verir ki, bu fikirləri Rəqəmsal İnkişaf və Nəqliyyat Nazirliyi yanında İctimai Şuranın üzvü Fərid Kazımov söyləyib.
Onun sözlərinə görə, müasir standartlara cavab verən və minlərlə müştərinin istifadə etdiyi “AniPay” mobil tətbiqində Anipay sistemində yeni istifadəçilərin qeydiyyatının qeyri-mümkünlüyü “xidmət keyfiyyətinin artırılması məqsədi ilə aparılan texniki işlərlə bağlı qeydiyyat prosesi müvəqqəti olaraq dayandırılıb.
Ekspert bildirib ki, yeni istifadəçilərin qeydiyyatının dayandırılması və qeyd olunan texniki işlərin Mərkəzi Bank tərəfindən bir neçə ay ərzində başa çatdırıla bilməməsi “AniPay” mobil tətbiqinin gələcək perspektivləri ilə bağlı artıq müəyyən narahatçılıq doğurur. Nəzərə almaq lazımdır ki, bir müddət əvvəl Mərkəzi Bankın gpp.az platformasının istifadəsinin dayandırılması ilə bağlı bütün istifadəçilər büdcə, kommunal, rabitə, cərimə, sığorta və digər ödənişlərin aparılmasını da “AniPay” mobil tətbiqində həyata keçirirlər.
Fərid Kazımovun sözlərinə görə, “AniPay” ödəniş xidməti bazarında son dərəcə maraqlı innovativ həllərdən biridir. Sistem mobil nömrə ilə istənilən bank müştərisinə köçürmə və QR kod ilə ödəmə imkanlarını təklif edir. Eyni zamanda büdcə, kommunal, rabitə, cərimə, sığorta və digər xidmətlər üzrə ödənişləri heç bir bank tətbiqində təqdim olunmayan ümumiləşdirilmiş şəkildə ödəmək mümkündür. Bu ödəniş sisteminin davamlı inkişafı Azərbaycanda yaxın illərdə rəqəmsal ödənişlər üçün maliyyə alətlərinin çeşidililiyini təmin edilməsinə xüsusi töhvələr verə bilər:
“Ümid edirəm ki, yeni istifadəçi qeydiyyatnının dayandırılmasına səbəb olan texniki işlərin görülməsi nəhayət ki, aradan qaldırılacaq və yaxın zamanda “AniPay” tam funksionallığı ilə yenə də bu sistemdən ilk dəfə istifadə etmək istəyən vətəndaşların xidmətində olacaq.”-deyə müsahibimiz vurğulayıb.
