Aprelin 21-də Ümumdünya Yaradıcılıq və İnnovasiya Günü qlobal səviyyədə qeyd olunur.
“EDnews” xəbər verir ki , bu əlamətdar gün Birləşmiş Millətlər Təşkilatının beynəlxalq günlər sisteminin bir hissəsidir və ilk dəfə 2002-ci ildə qeyd olunub və Dayanıqlı İnkişaf Məqsədlərinə (SDG) nail olmaq ilə bağlı problemlərə yaradıcı həll yollarının əhəmiyyətini vurğulamaq üçün 2017-ci ildə BMT Baş Assambleyası tərəfindən təsis edilib.
BMT-nin məlumatında bildirilir: “Yaradıcılıq haqqında universal anlayış olmaya bilər. Konsepsiya iqtisadi, sosial və davamlı inkişaf kontekstində bədii ifadədən problemin həllinə qədər şərhə açıqdır. Buna görə də Birləşmiş Millətlər Təşkilatı insan inkişafının bütün aspektlərində yaradıcılıq və innovasiyanın rolu haqqında məlumatlılığı artırmaq məqsədilə aprelin 21-ni Ümumdünya Yaradıcılıq və İnnovasiya Günü kimi təsis edib”.
Məlumatda bildirilir ki, yaradıcılıq bəşəriyyətin zəngin mədəniyyətləri sintezinin qurulmasına kömək edir, həmçinin sosial və iqtisadi inkişafı dəstəkləyir. BMT-nin Təhsil, Elm və Mədəniyyət Təşkilatı (UNESCO) 2005-ci il Konvensiyasından sonra ölkələrə yaradıcılıq sənayelərini gücləndirməyə və sənət azadlığını təşviq etməyə kömək edir. Yaradıcı iqtisadiyyatın da vahid tərifi yoxdur. Bu, insan yaradıcılığı və ideyalar, habelə əqli mülkiyyət, bilik və texnologiya arasındakı qarşılıqlı əlaqə üzərində qurulan inkişaf edən bir konsepsiyadır.
Audiovizual məhsullar, dizayn, yeni media, ifaçılıq sənəti, nəşriyyat və təsviri sənəti əhatə edən yaradıcı sənayelər gəlirlərin yaradılması, iş yerlərinin açılması və ixrac gəlirləri baxımından dünya iqtisadiyyatının yüksək transformativ sektorudur. Mədəniyyət davamlı inkişafın vacib komponentidir, həmçinin şəxsiyyət və cəmiyyət üçün innovasiya və yaradıcılıq mənbəyini təmsil edir. Eyni zamanda, yaradıcılıq və mədəniyyət inklüziv sosial inkişafa, xalqlar arasında dialoqa və anlaşmaya töhfə verən əhəmiyyətli qeyri-maliyyə dəyərinə malikdir. Bu gün kreativ sənayelər dünya iqtisadiyyatının ən dinamik sahələrindən biridir və inkişaf etməkdə olan ölkələrə dünya iqtisadiyyatının gəlirli sahələrində sıçrayış etmək üçün yeni imkanlar verir.
Mədəniyyət və yaradıcılıq qlobal Ümumi Daxili Məhsulun (ÜDM) 3,1 faizini və bütün məşğulluğun 6,2 faizini təşkil edir. Mədəni malların və xidmətlərin ixracı 2005-ci ildən dəyərini iki dəfə artıraraq 2019-cu ildə 389,1 milyard ABŞ dollarına çatıb. UNESCO-nun “Yaradıcılıq üçün siyasətlərin yenidən formalaşdırılması – mədəniyyətin qlobal ictimai sərvət kimi ünvanlanması” təşəbbüsü qlobal səviyyədə formalaşmaqda olan tendensiyaları işıqlandıran, eləcə də 2030-cu ilə və ondan sonrakı dövrlərə qədər tərəqqiyə töhfə verən yaradıcı ekosistemləri inkişaf etdirmək üçün siyasət tövsiyələri irəli sürən yeni məlumatlar təqdim edir.
Ölkəmizdə bu sahədə “Kreativ Azərbaycan” virtual platforması təsis olunub. Platformanın əsas məqsədi dövlət və özəl sahələrdə çalışan istedadlı və yüksək bacarığa malik olan şəxslərin bir araya gəlməsi və aktual məsələlərin onlayn formada müzakirəsini təşkil etməkdir.
Fatimə Mərdanlı // EDnews
