11 avqust tarixindən etibarən Mastercard öz kart şəbəkəsində icazə verilən və yekunlaşdırılmış tranzaksiyalar üçün Mastercard FX Rate Lock sistemini tətbiq edir. Mastercard FX Rate Lock avtorizasiya zamanı tətbiq olunan eyni valyuta konvertasiya faizlərinin (satınalma vaxtı) tranzaksiya yekunlaşdırılması zamanı da tətbiq olunmasına zəmanət verir (satınalma məbləğinin alıcı və emitent banklar vasitəsi ilə satıcıdan kart sahibinə ötürülmə vaxtı).

Bu barədə Mastercard Azərbaycanın vitse prezidenti Erdem Çakar Eurasia Diary-yə müsahibəsində bildirib.

O, bu dəyişikliklərin kart istifadəçiləri üçün müsbət nəticələr doğuracağına inanır.

“Bu dəyişiklik valyuta konvertasiyası faizlərini satınalma yerində şəffaflaşdıraraq istehlakçı təcrübəsini yaxşılaşdırır”, deyə Çakar söyləyib.

Onun sözlərinə görə hazırkı dəyişikliklər iqtisadi baxımdan hər iki tərəfə həm alıcılara həm də satıcılara sərf edir.

“Alıcılar interaksiya nöqtəsində şəffaf valyuta konvertasiyası faizi əldə edirlər. Həmçinin, satınalma nöqtəsində məlumatlı bir qərar vermək üçün onlar həmin faizlərə birbaşa çıxış əldə edə bilirlər. Satıcılar istehlakçıya məhsul və ya xidmət dəyərinin dəqiqliyini təmin etməklə daha yüksək satış nisbətinə (xüsusilə e-ticarətdə daha az alış-veriş imtinası) sahib olurlar”.

Erdem Çakar konvertasiya əməliyyatının isə kartı verən bankın faizləri ilə deyil, Mastercard faizləri ilə aparılacağını qeyd edib.

“Hərçənd, emitent banklar sərhədlərarası transaksiyalar zamanı yaranan əməliyyat xərclərinə əsasən bu faizlərə komissiya əlavə edə bilərlər”.

Mastercard Azərbaycanın vitse-prezidenti bu dəyişikliyin müştərilərin kredit kartlarındakı limitlərinə və ya debet kartlardakı maksimum xərcləmə (nağdlaşdırma) limitinə təsir göstərmədiyini deyib.

O, banklara "öz təqdirlərinə görə" dəyişiklik etmək hüququ verməmək üçün bu dəyişikliklərin bir hissəsi olaraq hansı yeni qaydalar, normalar təqdim edildiyini izah edib:

“Mastercard FX Rate Lock, avtorizasiya zamanı tətbiq olunan eyni valyuta konvertasiya faizlərinin tranzaksiya yekunlaşdırılması zamanı da tətbiq olunmasına zəmanət verir. Banklar, sərhədlərarası tranzaksiyalar zamanı yaranan əməliyyat xərclərinə əsasən bu dərəcələrə komissiya əlavə edə bilərlər”.

Mətbuatda yayılan bəzi məlumatlara görə, inzibati tənzimləmə və kartların qəbulu üçün ödəniş məhdudiyyəti davam edərsə, banklar bəzi xidmətlər üçün müştərilərdən pul tələb etmək məcburiyyətində qalacağı qeyd olunub.

“Spekulyativ məlumatlara münasibət bildirə bilmərik. Buna baxmayaraq, inamla deyə bilərik ki, bu dəyişiklik satınalma yerində valyuta konvertasiyası faizlərinə şəffaflıq gətirərək istehlakçı təcrübəsini yaxşılaşdırır”, deyə Mastercard Azərbaycanın vitse-prezidenti bildirib.

Sədrəddin Ağcayev