2000 və 2008-ci illərin iqtisadi böhran proqnozları ilə tanınan amerikalı iqtisadçı Con Hassman ABŞ fond bazarında mümkün çöküş barədə xəbərdarlıq edib. Əgər bu proqnoz özünü doğruldarsa Azərbaycan iqtisadiyyatına təsiri necə olacaq?

Mövzu ilə bağlı Ednews-a açıqlama verən iqtisadçı Rəşəd Həsənov Azərbaycan iqtisadiyyatının yarana biləcək dünya böhranından öz payını alacağını vurğulayıb:

“Ümumilikdə Azərbaycan iqtisadiyyatı hər nə qədər konservativ olsa da, dünya iqtisadiyyatından asılıdır. Əvvəlki böhranlardan əldə edilən təcrübə onu göstərir ki, böhran dövrlərində Azərbaycan resurslarına tələb kəskin şəkildə azalır. Tələbin azalması da təbii şəkildə qiymətləri aşağı salır. Bir sözlə, Azərbaycan gəlirlərin kəskin azalması ilə nəticələnir.

Böhran zamanı ölkə məzənnəsinin qorunub saxlanılması, büdcə xərclərinin öhdəliklərinin yerinə yetirilməsi və maliyyə sisteminin yaranmış vəziyyətə reaksiyasını nəzərə  almaq lazımdır. Əgər belə bir böhran baş versə, Azərbaycan da bundan öz payını alacaq. Amma bütün  bunlar indiki halda sadəcə olaraq nəzəri gözləntilərdir”.

Fərid