Çin 2025-ci ildə Azərbaycana tranzit yük daşımaları üçün daha əlverişli imkanlar təqdim edəcək ki, bu da ətraf regionlardan Çinə ölkə ərazisi ilə tədarükün genişləndirilməsinə təkan verəcək.

Bu barədə Çinin Azərbaycandakı müvəqqəti işlər vəkili Din Tao bu gün ilin yekununa həsr olunmuş mətbuat konfransında suallardan birini  cavablandırarkən deyib.

Onun sözlərinə görə, Azərbaycan malik olduğu coğrafi üstünlüklərə, böyük tranzit potensialına və yaxşı infrastruktura əsaslanaraq Transxəzər Beynəlxalq Nəqliyyat Marşrutu (TBNM, Orta Dəhliz) sayəsində regional qarşılıqlı əlaqələrin dərinləşməsində getdikcə daha mühüm rol oynayır və onun Avrasiyada mühüm nəqliyyat qovşağı kimi mövqeyi daha da möhkəmlənir.

"Statistik məlumatlara görə, cari ilin 10 ayında sözügedən marşrutla yük daşımalarının həcmi illik müqayisədə 68 % artaraq 3,8 milyon tona çatıb. İllik göstəricinin rekord səviyyəyə çatacağı gözlənilir", - müvəqqəti işlər vəkili bildirib.

D.Tao qeyd edib ki, Çin regional iqtisadi inkişafa töhfə verilməsində, eləcə də qlobal istehsal və təchizat zəncirinin sabitliyinin təmin edilməsində Orta Dəhlizin roluna böyük əhəmiyyət verir.

Qeyd edək ki, Transxəzər Beynəlxalq Nəqliyyat Marşrutu Çin, Qazaxıstan, Xəzər dənizi, Azərbaycan, Gürcüstan ərazisindən keçərək Türkiyə və Avropa ölkələrinə uzanan beynəlxalq nəqliyyat dəhlizidir.