Bazar ertəsi kriptovalyuta qiymətləri aşağı düşüb: BTC üç həftənin minimumuna, Ether isə sentyabrın əvvəlindən bəri ən aşağı səviyyəyə çatıb. Qlobal ticarət müharibəsinin kabusu investorları narahat edib və onları riskli aktivlərdən uzaqlaşdırıb.  

"EDnyus" xəbər verir ki, bu barədə "Reuters" yazır.  

Dünyanın ən böyük və ən tanınmış kriptovalyutası olan Bitcoin $94 476,18-ə qədər ucuzlaşaraq, üç həftənin minimumu olan təxminən $91 441,89 səviyyəsinə çatıb. Daha kiçik kriptovalyuta olan Ether isə təxminən 24% dəyər itirərək, sonuncu dəfə sentyabrın əvvəlində müşahidə edilən səviyyəyə qayıdıb.  

Həftəsonu ABŞ prezidenti Donald Tramp Meksika və Kanadadan gətirilən əksər məhsullara 25%, Çindən idxal edilən mallara isə 10% rüsum tətbiq edəcəyini elan edib. Yeni qaydalar çərşənbə axşamından etibarən qüvvəyə minəcək.  
 

ABŞ-ın iki ən böyük ticarət tərəfdaşı olan Kanada və Meksika dərhal cavab tədbirləri görəcəklərini bildirdilər, Çin isə Trampın rüsumlarını Dünya Ticarət Təşkilatında mübahisələndirəcəyini bəyan edib.  

Kriptovalyuta ticarəti fasiləsiz, o cümlədən həftəsonları da davam edir və son vaxtlar ümumi bazar əhval-ruhiyyəsinə qarşı həssaslaşıb. İnvestorlar narahatdırlar ki, tariflər iqtisadi artıma və şirkət mənfəətinə mənfi təsir edə, eyni zamanda inflyasiyanı sürətləndirə bilər.  

Xatırladaq ki, Bitcoin və digər kriptovalyutalar kəskin şəkildə ucuzlaşmışdı, çünki yeni Çin süni intellekt modelinin təqdim edilməsi riskli aktivlərin qlobal satış dalğasına səbəb olmuşdu.