"Azərbaycanın D-8-ə üzv olmağı onu regionda etibarlı tərəfdaş kimi təsdiqləyir".
"EDnews" xəbər verir ki, Beynəlxalq Avrasiya Mətbuat Fondunun Prezidenti Umud Mirzəyev Azərbaycan Respublikasının "İslam Səkkizliyi" təşkilatına üzv olmağını şərh edərkən deyib. Təşkilatın Azərbaycanın və regionun iqtisadi potensialına müsbət töhfə verə biləcəyini vurğulayan BAMF-ın prezidenti bu hadisəni müsbət qiymətləndirib:
"Azərbaycanın "İslam Səkkizliyi" (D-8) təşkilatına üzvlüyü onun beynəlxalq aləmdəki mövqeyinin güclənməsini və regionlararası əməkdaşlığın dərinləşməsini nümayiş etdirir. Belə bir üzvlük, Azərbaycanın beynəlxalq layihələrdə iştirakını artırmaqla onu regionda etibarlı tərəfdaş kimi təsdiqləyir. Xüsusilə, D-8 sammitində təmsil olunan dost ölkələrlə olan sıx əlaqələr Azərbaycanın qlobal və regional iqtisadi potensialını artırır. Bu əlaqələrin möhkəmləndirilməsi beynəlxalq platformada ölkəmizin təsirinin artmasının əhəmiyyətini bir daha vurğulayır. Şübhəsiz ki, bu nailiyyət Azərbaycanın uğurlu xarici siyasətinin ən parlaq nəticələrindən biridir.
Ölkənin strateji coğrafi mövqeyi Asiya və Avropa arasında tranzit yollarını birləşdirən mühüm nəqliyyat və lojistika mərkəzi kimi rolunu daha da gücləndirən əsas faktorlardandır. Əminliklə demək olar ki, Azərbaycanın strateji tranzit mövqeyi D-8 ölkələri arasında ticarət və nəqliyyat əlaqələrinin genişlənməsinə imkan yaradacaq. Bu, həmçinin, Azərbaycanın iqtisadi inkişafını dəstəkləyən yeni bazarlara çıxış əldə etməsini təmin edə bilər. Nəticə etibarilə Azərbaycanın bu platformada iştirakı digər üzv ölkələrə strateji infrastruktur, enerji layihələri və lojistika sahəsində yeni imkanlar təqdim edərək hər iki tərəf üçün uzunmüddətli fayda yarada bilər".
