Azərbaycan, Türkiyə və Qazaxıstanın birgə hazırladığı kub peyk gələcəkdə Türk Dövlətləri Təşkilatının (TDT) digər üzv və müşahidəçi dövlətlərində maraq yarada bilər.

“EDnews” xəbər verir ki ,  bunu TDT-nin baş katibi Kubanıçbek Omuraliyev Bakıda keçirilən TDT ölkələrinin kosmik agentliklərinin 4-cü görüşündə bildirib.

Onun sözlərinə görə, birgə “CubeSat” peykinin (Kub peyk) yaradılması layihəsi kosmik sahədə əməkdaşlığın əsas istiqamətinə çevrilib: "Təşəbbüsün birinci görüşdə təqdimatından etibarən layihə davamlı və ardıcıl şəkildə inkişaf edir".

K. Omuraliyev bildirib ki, Daşkənddə keçirilən ikinci görüşdə tərəflər layihəyə dəstəklərini təsdiqləyib və hər iştirakçı və müşahidəçi ölkədən iki texniki ekspert və bir texniki menecerdən ibarət Rəhbər Komitənin yaradılması barədə razılığa gəliblər: “Müzakirələr 2023-cü il oktyabrın 4-də Bakıda 74-cü Beynəlxalq Astronavtika Konqresi çərçivəsində keçirilən üçüncü işçi görüşündə, həmçinin oktyabrın 26-da ekspertlərin onlayn görüşündə davam etdirilib. 2024-cü il iyulun 9-10-da Astanada keçirilən beşinci görüşdə peykin növbəti inkişaf mərhələsinin ümumi yol xəritəsi üzrə konsensusa nail olunub. Bu gün biz nümayəndə heyətlərinin bu flaqman layihənin cari statusu haqqında məruzələrini gözləyirik. Katiblik əmindir ki, növbəti mərhələlərdə təşəbbüs TDT-nin üzvü olan digər ölkələrin də marağına səbəb olacaq. Hələlik isə artıq cəlb olunmuş iştirakçılarla işi davam etdiririk".

Fatimə Mərdanlı //EDnews