İsveçdə hipotermiyadan ölənlərin sayı son on ildə iki dəfədən çox artıb.

“EDnews” xəbər verir ki,ən çox zərərçəkənlər alkoqol və ya narkotik vasitələrin təsiri altında olan şəxslər, həmçinin demensiyadan əziyyət çəkən yaşlı insanlardır.

2022-ci ildə 99 nəfər hipotermiyadan ölüb ki, bu da rekord göstəricidir. 2024-cü il üçün məlumatlar hələ tam işlənməsə də, artım tendensiyası davam edir. İlkin statistik məlumatlara görə, ötən ilin birinci yarısında 60 nəfər ölüb ki, bu da 54 hadisənin qeydə alındığı 2023-cü ilin analoji dövrü ilə müqayisədə çoxdur.

Məhkəmə-tibb ekspertləri deyirlər ki, ölüm hallarının artması diaqnostik üsulların dəyişməsi və ya keçmişdə oxşar hallar haqqında az məlumatlandırılma ilə bağlı deyil. Hər bir ölüm faktı həkimlər tərəfindən qeydə alınır və xarici faktorlardan şübhələndikdə, polis araşdırması aparılır.

Əsas risk qrupunun evsiz və ya qeyri-qanuni miqrantlar olması ilə bağlı təsbitlərə baxmayaraq, məhkəmə-tibb ekspertləri ölənlər arasında belə halların ciddi üstünlük təşkil etdiyini görmürlər. Hipotermiyadan ölüm riskini artıran əsas amillər orqanizmin soyuqdəymə müqavimətini azaldan alkoqol və narkotik istifadəsi, insanların yolunu azmasına və evinə gedə bilməməsinə səbəb ola biləcək psixi pozğunluqlar və demensiya, yaşlı və həssas qrupları köməksiz qoyan sosial təcrid amilidir.

Psixiatriya klinikalarından xəstələrin qaçaraq hipotermiyadan öldüyü bir neçə məlum hal da var.

Mütəxəssislər həssas qrupları qorumaq üçün güclü tədbirlərə, hipotermiya riskləri haqqında məlumatlılığın artırılmasına və daha yaxşı sosial dəstəyə çağırırlar. Xüsusilə, qış dövründə risk altında olan insanların operativ şəkildə müəyyən edilməsi və onlara lazımi yardımın göstərilməsi vacibdir.

Fatimə Mərdanlı//EDnews