İslami həyat tərzini təbliğ edən beynəlxalq korporasiya qul əməyindən istifadə, cinsi istismar və uşaq qaçırmada ittiham olunur.

"EDnyus" xəbər verir ki, bu barədə CNN məlumat yayıb.

Söhbət Malayziyanın "Global Ikhwan Services and Business Holdings" (GISBH) şirkətindən gedir. Onun fəaliyyəti biznesin müxtəlif aspektlərini, o cümlədən kənd təsərrüfatı, ticarət, məişət xidmətləri, media və tibb sahələrini əhatə edir. Əsas istiqamətlər arasında dünyanın böyük şəhərlərində, məsələn, İstanbul, Paris və digərlərində "Nur Malaysia" və ya "Nur Məhəmməd" halal restoranlar şəbəkəsi yer alır.
 
GISBH liderləri öz ardıcıllarının əməyindən sui-istifadə etməkdə, uşaqları yetimxanalardan oğurlamaqda və onların dəbdəbəli həyat tərzlərini maliyyələşdirən ianələr toplamağa məcbur edən kult tipli təşkilatı idarə etməkdə ittiham olunurlar.

2024-cü ilin sentyabrında Malayziya polisi şirkət tərəfindən idarə olunan 20-dən çox evə basqın edib. Onlar 600-dən çox uşağı azad ediblər və o vaxtdan bəzilərini uşaq alveri, cinsi istismar və mütəşəkkil cinayətdə ittiham edərək yüzlərlə adamı həbs ediblər.

GISBH hüquqşünası Rosli Kamaruddin bildirib ki, şirkət rəhbərləri ittihamlarla mübarizə aparmağı planlaşdırıblar.

Zərərçəkənlər CNN-ə deyiblər ki, onların xarici dünya ilə əlaqəsi və mobil telefonlara çıxışı olmayıb, xəbərləri yalnız Əl-Ərqam İslam kultunun (1990-cı illərin ortalarında Malayziyada qadağan edilib) təlimlərini təbliğ edən daxili televiziya kanalı vasitəsilə alıblar.