“ABŞ Ermənistanı Rusiyadan qoparıb Qərbyönümlü dövlət etmək niyyətindədir. Bu istiqamətdə artıq ciddi şəkildə Ermənistana dəstək göstərilir”.

Bu sözləri Ednews-a politoloq Natiq Miri ABŞ-ın dövlət rəsmisi Nelson Pelosinin Ermənistana rəsmi səfərinin arxasında duran geosiyasi hədəfləri şərh edərkən bildirib.

Politoloq qeyd edib ki, Vaşinqton Ermənistanda Rusiyanın təsirini azaltmaq üçün bir çox maneverlərdən istifadə etməyə başlayıb.

“Pelosi Ermənistan rəsmiləri ilə görüşlərində açıq şəkildə bəyan edib ki, əgər İrəvan KTMT, daha doğrusu, Rusiyanın orbitindən çıxmağa cəhd göstərərsə, ABŞ Ermənistana hər cür dəstək göstərməyə hazır olacaqdır. Burada əsas hədəflərdən biri Rusiyanı bölgədən tam şəkildə kənarlaşdırmaqdır. Fikir verirsinizsə, Ermənistan cəmiyyətində artıq Qərbmeyilli düşüncələr artmaqdadır, bu ölkədə Rusiya əlehinə etiraz nümayişləri və aksiyaları keçirilir. Ermənistanın bir çox siyasi ünsürləri KTMT-ni tərk etməyə çağırırlar”.

Natiq Mirinin fikrincə, Ermənistanın Rusiya blokundan ayrılması o qədər də asan məsələ deyil.

Politoloq, həmçinin qeyd edib ki, Ermənistan-Azərbaycan sərhədində son hərbi qarşıdurmalar KTMT-ni gözdən salmaq üçün əvvəlcədən düşünülmüş təxribatxarakterli bir plandır.

“Ermənistanda müəyyən siyasi qüvvələr KTMT-dən ayrılmaq üçün siyasi və hüquqi zəmin hazırlayırlar. Fikir verirsinizsə, sərhəd qarşıdurmalardan sonra səhərisi gün KTMT-yə müraciət olundu. Ancaq Ermənistan hakimiyyəti əmin idi ki, Rusiya və təşkilatın digər üzv ölkələri öz ordularını Azərbaycana qarşı Ermənistana göndərməyəcəklər. Çünki Moskva və onun digər müttəfiqləri Azərbaycanla münasibətləri pozmaqda maraqlı deyillər, ən azından hadisəni araşdırmaq üçün ekspertlər səviyyəsində tədbirlərin görülməsinə qərar verilib. Bu da, əlbəttə, Ermənistanı qane etmir. Onlar düşünürlər ki, təxribat istər Ermənistan, istərsə Azərbaycan tərəfindən törədilsə belə, KTMT gözüyumlu Ermənistana hərbi dəstək göstərməlidir, Azərbaycan ordusu ilə üz-üzə gəlməlidir. Rusiya və KTMT-nin üzv dövlətləri isə Azərbaycanla münasibətlərdə maraqlarını düşündüklərindən prosesə etiqanlı yanaşıblar. Belə olan təqdirdə Ermənistanda o saat elə bir ab-hava yaratdılar ki, guya KTMT uğursuz təşkilatdır, bu təşkilat Ermənistanın təhlükəsizliyinə zəmanət vermir”.

Rusiyanın nəhəng qaz şirkəti "Qazprom"un qaz borcları ilə bağlı Ermənistana xəbərdarlıq məsələsinə münasibət bildirən Natiq Miri ehtimal edib ki, Kreml İrəvana hər tərəfli ciddi təzyiqlər edəcək.

“Həm qiymətlərin ucuz olması, həm də borcların müddətinin uzadılması baxımından Rusiya Ermənistana kifayyət qədər güzəştlər edib. Qaz məsələsində Moskvanın dərhal dinlənməsi İrəvana ciddi şəkildə mesajdır, yəni məcazi mənada desək, oturduğun skamya Rusiyanın sahəsində olub və nə badə onun ayaqlarını kəsməklə məşğul olarsan. Bununla yanaşı, yaxın gələcəkdə Ermənistan üzərində siyasi, hərbi və iqtisadi təzyiq mexanizmləri daha da ağırlaşdırıla bilər. Bildiyimiz kimi, Ermənistan ordusunun zabitlərinin əksəriyyətinin Rusiya kəşfiyyatı ilə sıx əlaqələri var. Eləcə də Ermənistanın strateji cəhətdən önəmli olan iqtisadi obyektləri də rus biznesmenlərinin əlindədir. Amma Rusiya hələlik qaz çərçivəsində Ermənistanı hədələməyə başlayıb”. 

Sonda Natiq Miri Ermənistan-Qərb yaxınlaşmasının İran-Ermənistan əlaqələrinə təsir göstərməsindən söz açıb;

“Rusiya və İrandan imtina Ermənistan üçün intihar ola bilər. Qeyd edim ki, İrəvan Tehranla gizli sövdələşmələrdən xeyli qazanc əldə edir. Köhnə silahların Yaxın Şərqdə terrorçulara daşınmasında və narko-ticarətdə Ermənistan mühüm tranzit rolunu oynayır.  Eyni zamanda İran və Ermənistan arasında güclü iqtisadi əməkdaşlıq da var. İran da Ermənistanla sərhədləri bağlasa, bu ölkə təmamilə məhv olar. Ona görə də Pelosinin Ermənistanda çıxışları quru bəyanatlardan başqa bir şey deyil. Regionda reallıq tam fərqlidir. Ermənistanın Türkiyə və Azərbaycanla sərhədlərini Rusiya qoruyur, amma ABŞ Ermənistana gəlib təhlükəsizliyə zəmanət verməsi mümkün deyil”.