Göyçə-Zəngəzur Respublikası yaradılacaq? - SORĞU - ednews.net

27 Sentyabr, Çərşənbə axşamı

(+994 50) 229-39-11

Göyçə-Zəngəzur Respublikası yaradılacaq? - SORĞU

Siyasət A- A A+

Türkiyənin paytaxtı Ankara şəhərində Göyçə-Zəngəzur Respublikasının nümayəndəliyinin açılışı olub. Sosial şəbəkələrdə nümayəndəliyin açılması xəbəri müzakirələrə səbəb olub. Həmçinin qeyd edilib ki, Göyçə-Zəngəzur Respublikası da yaradılacaq. Belə olan halda Qarabağda yenidən müharibə də gözlənilə bilərmi?

Ednews mövzu barəsində ictimai şəxslərin münasibətini öyrənib. Cavabları təqdim edirik:

Millət vəkili Tahir Rzayev:

“Bu məsələnin qaldırılması reallıqları özündə əks etdirir. Çünki o yerlər tarixən Azərbaycan torpaqları olub. Bu cür müzakirələr də o torpaqlara qayıdış təsəvvürü yaradır. Bu siyasətin tərkib hissəsdir. Belə çağırışlar olmalıdır. Torpaqlar bizimdirsə o yerlərə qayıdışımızı təmin etməliyik və bu barədə beynəlxalq ictimaiyyət məlumatlandırılmalıdır. Ermənilər uzun müddət olmaya-olmaya belə kampaniya aparırlar. Müəyyən mənada da istəklərinə nail olurlar. Qarabağ heç vaxt onların torpağı olmayıb. Azərbaycanın müəyyən əraziləri heç vaxt onların torpaqları olmayıb. Lakin düşmən uzun illər bu təbliğatı aparıblar və inandırıblar ki, o torpaqlar özlərinindir. Özümüzün olan torpaqlara görə niyə məsələləri qaldırmayaq? İndiki vaxta da lap yerində edilmiş təşəbbüsdür. Təqdirə layiqdir. Onsuz da müharibə davam edir. Ermənistanın da tutduğu yol bizə məlumdur. Onlar ancaq savaş yolunu tutublar. Belə olan halda yenidən müharibənin başlanmasına bu məsələlərin zəmin yaradıb-yaratmamasının heç bir əhəmiyyəti yoxdur. Biz sülh çağırışları edirik, onlar buna məhəl qoymurlar. Təxribatlar törədir, beynəlxalq aləmə çıxırlar. Amerikanın, Fransanın hakimiyyət dairələrinin hərəsi Azərbaycan haqda çirkin fikir bildirirlər. Belə olan halda Azərbaycan müharibəyə hazır olmaldır.  Həm də təbliğatımızı da aparmalıyıq”.

Müasir Müsavat Partiyasının sədri Hafiz Hacıyev:

“Göyçə-Zəngəzur Respublikası çoxdan mövcud olan ideyadır. Mənasız və yersiz ideyadır. Biz buna rəvac verə bilmərik. Hörmətli deputatlarımız da bu məsələdən ağızdolusu danışırlar. Biz bu gün Qarabağ məsələmizi həll etməliyik. Qarabağ tam azad olmadıqca başqa mövzulardan, ideylardan boş-boş danışmaq olmaz. Real olan işin arxasınca getməliyik. Xocalı, Xankəndi, Xocavənd, Ağdərə qalıb. Biz bunları azad etməliyik. Yoxsa ki, beş-altı həvəskar adam yığılıb Respublika yaratsın. Göyçə mənim vətənimdir. Lakin bu söhbətlər hələ real deyil. İrəvan da, Göyçə də bizim olub.

Bu cür populist ideylarla, çıxışlarla məşğul olmaq yersizdir. Bu barədə ciddi nəsə deyə bilmirəm. Gələcəyi olmayan iş hesab edirəm. Ali Baş Komandanın ətrafında olaq, Xocalının qisasını alaq. Əsas məsələmiz Qarabağdır!”

Politoloq Şahin Cəfərli:

"Nə qədər ki, sülh müqaviləsi imzalanmayıb, eləcə də sərhədlərin delimitasiyası və demarkasiyası həyata keçirilməyib, hərbi toqquşma ehtimalı hər zaman yüksək olacaq.

Bununla yanaşı, Qarabağda Azərbaycan genişmiqyaslı bir hərbi əməliyyat keçirib, Xankəndi və rus sülhməramlılarının nəzarətində olan digər əraziləri geri alması ehtimalını hələki real görmürəm. Bunun üçün ən əvvəl Rusiya ilə anlaşmaq lazımdır. Rusiya isə buna razı olmaz - ən azı, əvəzində nəsə əldə etmədən, bizdən bir şey almadan Moskva belə bir əməliyyata razılıq verməz. Onlar hansı halda Azərbaycanın Xankəndinə qayıdışına razı ola bilərlər? Məsələn, mümkündür ki, Rusiya sülhməramlılarına Azərbaycan tərəfindən daimi hərbi baza statusu verilməsini istəyə bilərlər. Yəni təxminən SSRİ dövründəki status-kvonun bərpası. Bu halda Rusiya Azərbaycanda və bölgədə öz mövqelərini gücləndirmiş və burdakı mövcudiyyətini təminat altına almış olur. Azərbaycan belə bir varianta gedərmi? İndiki halda buna birmənalı "hə" və ya "yox" cavabı vermək çox çətindir. Bu, qlobal və regional geosiyasi proseslərin gedişindən asılı olacaq. Rusiya və Türkiyədə Putin və Ərdoğan hakimiyyətlərinin gələcək taleyi bizim bölgəyə birbaşa təsir göstərəcək".



Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...